+ Cuonradvs + miseratione divina Portuensis et sancte Ruffine episcopus¹ apostolice sedis legatus universis Christi fidelibus presentes litteras inspecturis salutem in domino. || Quoniam^a), ut ait apostolus, omnes stabimus ante Christi tribunal recepturi, prout in corpore gessimus, sive bonum fuerit sive malum, oportet nos diem messionis ex||treme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus || in celis, firmam spem fiduciamque tenentes, quoniam^a) qui parce seminat, parce metet, et qui seminat in benedictionibus, de benedictionibus metet vitam eternam. Cum igitur, sicut intelleximus, conventus sancti Galli pro vestitu et luminaribus minus^b) sufficientes habeant reditus sine oblationibus, que a peregrinis illuc venientibus offeruntur ibidem, volentes, ut eis super predictis devotius a Christi fidelibus succurratur, omnibus, qui ad predictum monasterium sancti Galli cause devotionis accesserint in festivitatibus eiusdem sanctissimi sancti Galli et dedicationis monasterii memorati et de bonis suis ibidem obtulerint, secundum quod inspiraverit eis deus, de omnipotentis die confisi misericordia licet indigni quadraginta dies de iniunctis penitentiis et hiis etiam, qui in carrina sunt et ad locum predictum causa peregrinationis venerint in festivitatibus supradictis, dies quatuordecim de carrina auctoritate legationis qua fungimur relaxamus, per octo dies ante et post festivitates predictas remissiones huiusmodi extendentes. Dat. apud sanctum Gallum, anno domini M°.CC° vicesimo quinto, VIII°. id. februar.

Source Fulltext: Chartularium Sangallense III, Nr. 1105, S. 140-141.