Allen den, die disen brief ansehent lesent oder ho^errent lesen, kvnden wir herr V^olrich von Singenberg ritter vnd || drvhsa^eze des gotzhvses ze sant Gallen¹ vnd V^olrich der Blarrer² stifterre vnd anvaherre des nidern spitals ze sant Gallen³, || das wir mit ainwilligen mv^ot vnd mit wiser lvten rât den vorgenemten spitâl in das reht vnd in die gewonhait setzen || vnd gesetzet haben vnd o^vch iemer, die wil er stât, wellint, das er in der gewonhait belibe, das alle vnser nahkomen, die ober maister vnd phlegerre ald die vnder maister des spitals haissent vnd sind, dehain menschen mân noh vrowen enphahen sont bi gesvndem libe durch bette noch vmb dehain gv^ot, won der dem spitâl vnd den siechen mit dienste nvzze vnd gu^ot gesin mvg. Vnd sont o^vch nvt gebunden sin ze enphahen dvrch dehain bette, dv an sv getriben werde, dehain siechen, der das almv^osen mit ga^endem libe an aim stâbe ald vf krukken gevorderen ald erbitten mag vnd der dehain aigen gu^ot hab an ligendem ald an va^erndem gv^ot, das er geniessen mvge. Wir setzen o^och in dem vorgeschriben reht, das der spital gebunden sol sin ze enphahen alle ellende siechen, die fvr sich selben von siechtagen vnd von alter nvt me mvgent, vnd svnderbar des gotzhvses lvte, vnd sol o^vch gebvnden sin ze enphahenne kindbetterrinen, vnd sol man der phlegen in dem spitâl drie wochen vnd nit me. Vnd kind, dv nieman hant, sol man zvhen âne alle geva^erde, vnz das su nah dem almv^osen gegan mvgent. Wir die vor genemten stifterre hain o^vch irbetten vnser gena^edigen herren vnd die gedigen ze sant Gallen, das sv den phlegern des spitals helfen durch got die vorgenemten ordenvng beha^eben. Vnd ze ainer sta^eter sicherhait aller der dinge vnd ordenvng, so hic vor geschriben stand, dar vmb henken wir die vorgenemten herr V^olrich von Singenberg vnd V^olrich der Blarrer vnserv insigel an disen brief. Dirre brief ward geben des jares, do man zalt zwelf hvndert vnd zwainzig jar, dar nah in dem ahteden jar von der gebvrte vnsers herren Iesu Cristi.

Source Fulltext: Chartularium Sangallense III, Nr. 1162*, S. 171.