. . archiepiscopo Salc¸burgensi. Cuncta sapienter ab initio disponens sapientia dei patris sacrosancte matri ecclesie sponse sue providit certa remedia, per que ipso favente a necessitatum incursibus reddatur feliciter expedita. Hinc est, quod cum ipsa multis excitetur terre sancte clamoribus, ut eius miserando statui succursum celerem studeat impertiri, cui prestandi subsidium oportunitas tollitur, quin prius in dissidii discrimine constituti, quorum pressa molestiis cogitur ecclesia suspiriis inundare, in pacis federa reformentur, nos de te merito presumentes, ut qui dispositione divina es de maioribus eiusdem membris ecclesie sibi letanter debeas in necessitatis articulo subvenire, fraternitati tue per apostolica scripta firmiter precipiendo mandamus, quatinus prudenter advertens, quod id filiis debeat inesse potissimum, ut mater eorum intenta profectibus vigoris et potentie obtineat fulcimentum, et quod membris roboris munimen addicitur^a), si firma dispositio capitis habeatur, ad subventionem ecclesie, pro cuius libertate tuenda karissimus in Christo filius noster Fr. Romanorum imperator etc. paratus est magnifice prosequi, per quod tam ecclesie quam imperii iura favente domino valeant obtineri, apparatu strenuo te studeas communire, ita quod ecclesia proximo futuro martio te personaliter decenti militia comitatum, que in expensis tuis per tres menses preter tempus, quo veniet et recedet, ad eiusdem obsequia commoretur, vel saltem iam dictam militiam, si venire nequiveris, cum exultatione recipiat ac tuis et aliorum expedita subsidiis ad redemptoris gloriam in pacis gaudio reflorescat. Mandatum nostrum taliter impleturus, quod tuis et ecclesie tue comodis, cum oportunum fuerit, favorabiliter intendamus. Dat. Perusii, VII kl. decemb., pontificatus nostri anno octavo.||
. . . . . .||
In eundem modum abbati sancti Galli^b)1.||
. . . . . .

Source Fulltext: Chartularium Sangallense III, Nr. 1246, S. 210-211.