Albertus de Rossevvâc¹ imperialis curie iusticiarius omnibus presentem paginam intuentibus imperpetuum. Quoniam^a) labilis est memoria ho||minum, cautum est ea, que aguntur, litterarum officio commendari. Tenore presentium notum esse cupimus universis, quod, cum dominus Conradus venera||bilis abbas sancti Galli² et quidam obsides, quos obligaverat comiti Diethalmo de Tocchenburc³ ac suis heredibus pro Castro Vzenberc⁴, ad queri||moniam eiusdem comitis ac suorum heredum citati ad curiam imperialem coram nobis in iudicio comparerent, dictus dominus abbas iuxta formam sententie proinde late pro se ac obsidibus suis narrando factum proposuit in hec verba: Propter longam prehabitam discordiam, que quondam inter me et comitem Diethalmum ac suos heredes fuit, compositio intercessit amicabilis⁵, que ab utraque parte recepta fuit et sponte approbata, sub ea conditione, quod dictus comes et sui heredes ea, que in compositione fuerunt expressa, usque ad certum terminum inter nos condictum deberent perducere ad effectum, alioquin castrum Vzenberc, quod a me habebant an(te) in feudo, assignatum in manus meas termino completo mihi sine qualibet reclamatione vacare deberet, si ea, ut dixi, que in compositione expressa fuerant, dictus comes ac sui heredes non attenderent et servarent, et ego et ecclesia mea sine questione qualibet deberemus idem castrum perpetuo pacifice possidere. Si vero idem comes et sui heredes infra predictum terminum inter nos receptum complerent, que in eadem compositione fuerunt expressa, quindecim eis dedi obsides, qui dictum castrum Vzenberc eis reddere tenerentur. Unde cum post elapsum terminum sepedictum idem comes et sui heredes per annum et amplius perdurassent, quod prefatam compositionem ad effectum perducere non curabant, eisdem castrum Vzenberc reddere, quia de iure non debui, contradixi, ad quod utique me offero tam pro me quam pro meis obsidibus probaturum. Nos itaque processum huiusmodi diligentius attendentes, quid proinde iuris esset, requisita sententia per nobiles et alias personas synodales optentum exstitit, si predictus dominus abbas hec omnia supradicta vivo testimonio vel per instrumenta publica pro se et suis obsidibus probare posset in presenti, quod merito ab omni querela super predicta causa per eundem comitem non posset vel per suos heredes tam ipse quam sui obsides coram aliquo iudice conveniri. Et quia idem dominus abbas pro se et suis obsidibus vivo testimonio ac per instrumenta publica probavit legitime, prout dictum est superius processum esse, tam pro se quam suis obsidibus de omni impetitione eiusdem comitis ac heredum suorum super impetitione castri Vzenberc fuit sententialiter absolutus. Ad huius itaque rei memoriam presentes litteras cum subscriptione testium fecimus sigillari. Testes sunt hii: dominus C. burcgravius de Nu^oerinberc⁶, comes Albertus de Hauspurc⁷, B. et B. de Geroltsecke⁸, V^olr. de Clingen⁹, Bertholdus de Eschinbah¹⁰, Liutholdus senior et iunior de Regensperc¹¹, E. de Hasela¹², R. Schade, R. de Kayserstule¹³, C. de Tengen¹⁴, C. pincerna de Wintherstet¹⁵, H. de Arbona¹⁶, E. de Bichelense¹⁷, Wezelo de Haydelberc¹⁸ et alii quam plures. Actum apud Hageno^ve¹⁹, anno dominice incarnationis MCCXXXVI. X°. kl.marcii, none indict.

Source Fulltext: Chartularium Sangallense III, Nr. 1252, S. 214-215.