Reverendis in Christo dominis C. dei gratia de sancto Gallo abbati¹ et universis eiusdem ecclesie fratribus frater E. de Salem² || dictus abbas et eiusdem loci grex pusillus orationum munus et vere karitatis consortium. Nuntios || recepimus, qui ex parte vestri plenarium nostre confraternitatis postularent participium, sicut et dominis nostris de Au||gia³ iam pridem inpendimus. Et licet omnibus Christianis, si quid parvitas nostra coram deo potest, optemus inpertiri, in spetiali tamen hoc obsequio non multos possumus admittere, propter multam missarum numerositatem, que a generali nostro capitulo annuatim nobis inponuntur. Preter alias orationes et multa psalteria accedunt ad hec cottidiana obsequia, que morientibus fratribus nostris necesse habemus inpendere. Verumtamen^a) quia longam cum ecclesia vestra contraximus familiaritatis gratiam et in agendis nostris caritativos vos semper invenimus, ecce vobis annuimus, quod tamen sine difficultate solvere non possumus, hoc est^b), quod pro singulis vobis faciemus idem, quod pro dominis Augensibus et pro hiis, quibus pre omnibus spetialius tenemur, id est dominis Salzpurgensibus⁴ facere consuevimus. Vicem autem, quam dominus vobis inspiraverit, nobis rependetis.

Source Fulltext: Chartularium Sangallense III, Nr. 1274, S. 226.