. . abbas de Altorf et C. scolasticus Argentinensis dictus de Wasserstelze iudices a sede Magunt(ina) delegati viris honorabilibus . . ^a) preposito de Curwalde et electo in prepositum Curiensem dicto de Juualt deum habere pre oculis et non peccare. Scripsimus vobis aliquando, si bene meminimus, prohibentes sub pena excommunicationis, ne contra pauperculas mulieres abbatissam et conventum de Oberriet procederitis in causa, que inter ipsas ex una parte et venerabiles abbatem et conventum de sancto Gallo ex altera vertitur super quibusdam bonis iuris emphiteotici1 sitis Norsingen, cum eadem causa nobis a sede Magunt(ina) sit commissa et per nostram interlocutoriam, a qua non fuit appellatum legittime, non obstantibus litteris vobis ab eadem sede directis obtentis suggestione falsa veritate tacita sit recepta. Sed vos, mandatum nostrum minus provide contempnentes in ipsarum vexatione excommunicando de facto, ut asseritur, quia de iure non potestis, molestare contra deum et homines non cessatis. Unde cum ad nostram citati presentiam Argentinam propter excessum huiusmodi corrigendum, ubi etiam potuissetis autentici nostri copiam habuisse, non veneritis nec aliquem miseritis responsalem, vobiscum tamen mitius agere cupientes, monemus in domino, ne contra predictas mulieres aliquid de cetero attemptetis, scientes, quod si ultra verba vel scripturam apposueritis predictis mulieribus ad nocendum, nunc excommunicamus vos, precipientes eandem sententiam ab omnibus inviolabiliter observari, citantes vos nichilominus secunda feria post quasimodogeniti ad presentiam nostram Argentinam contra vos severius processuri, si prohibitionis nostre transgressores inventi fueritis in hac parte. Dat. anno domini M°.CC°.X°L. III°. in festo Benedicti presentis anni apud Argentinam.

Source Fulltext: Chartularium Sangallense III, Nr. 1312, S. 250-251.