Eisdem preposito et capitulo^a). Et si ad provisionem cunctorum, qui gratiam nostre provisionis exposcunt, intendere teneamur, circa illos tamen curam nos decet impendere specialem, qui et propriis meritis et devotorum ecclesie suffragiis adiuvantur. Sane dilecto filio R. clerico notario et nuntio¹ dilecti filii . . abbatis sancti Galli² tum ipsius clerici probitatis meritis, super quibus ei laudabile testimonium perhibetur, tum consideratione dicti abbatis nobis pro eo per suas litteras supplicantis gratiam facere intendentes, universitatem vestram rogamus et monemus attente ac mandamus, quatinus ipsum ob reverentiam apostolice sedis et nostram recipiatis in canonicum et in fratrem eique prebendam, siqua in ecclesia vestra vacat adpresens vel quamcito se facultas obtulerit, liberaliter conferatis. Non obstante, quod idem clericus alias beneficiatus existit, sive statuto de certo canonicorum numero iuramento seu alia firmitate vallato, vel si vobis direximus scripta nostra pro aliis, quibus auctoritate presentium nolumus preiudicium generari, aut qualibet alia indulgentia, per quam possit huius modi gratia impediri seu etiam retardari. Alioquin dilecto filio Bertoldo canonico Constantiensi³ damus nostris litteris in mandatis, ut vos ad id monitione premissa per censuram ecclesiasticam appellatione remota compellat. Dat. Lugduni, X. kl. maii, anno quarto.

Source Fulltext: Chartularium Sangallense III, Nr. 1380, S. 303-304.