+ Innocentius + episcopus servus servorum dei dilectis filiis . . abbati¹ et conventui monasterii sancti Galli ordinis || sancti Benedicti Constantiensis diocesis salutem et apostolicam benedictionem. Loca sanctorum omnium pia et prompta devotione sunt || a Christi fidelibus veneranda, ut dum dei honoramus amicos, ipsi nos amabiles deo reddant et illorum nobis vendicantes quodammo||do patrocinium apud ipsum, quod merita nostra non obtinent, eorum mereamur intercessionibus obtinere. Cum igitur, sicut petitio vestra nobis exhibita continebat, ad ecclesiam vestram ob devotionem beatorum confessorum Galli et Otmari², quorum corpora requiescunt ibidem, de longinquis partibus non modica Christi fidelium confluat multitudo, nos cupientes, ut dicta ecclesia congruis honoribus frequentetur et advenientes ad eam dono celestis gratie gaudeant se refectos, omnibus vere penitentibus et confessis, qui ecclesiam ipsam in festivitatibus eorundem confessorum et octo diebus ante ac totidem post festivitates easdem venerabiliter visitarint, de omnipotentis dei misericordia et beatorum Petri et Pauli apostolorum eius auctoritate confisi quadraginta dies de iniunctis sibi penitentiis annis singulis misericorditer relaxamus. Dat. Lugduni, X kl. ianuarii, pontificatus nostri anno septimo.

Source Fulltext: Chartularium Sangallense III, Nr. 1432, S. 331.