+ Innocentius + episcopus servus servorum dei dilectis filiis . . abbati Cistercii¹ eiusque coabbatibus et conventibus universis Cisterciensis ordinis || salutem et apostolicam benedictionem. Cum a nobis petitur, quod iustum est et honestum, tam vigor equitatis quam ordo exigit rationis, ut id per sollicitudinem || officii nostri ad debitum perducatur effectum. Ex parte siquidem vestra fuit propositum coram nobis, quod nonnulli ecclesiarum prelati vestris libertatibus invidentes, cum eis || non liceat ex apostolice sedis indulto in vos excommunicationis vel interdicti sententias promulgare, in familiares servientes et benefactores ac illos, qui molunt in molendinis vel coquunt in furnis vestris, quique vendendo seu emendo vel alias vobis communicant sententias proferunt memoratas, sicque non vim et potestatem privilegiorum vestrorum sed sola verba servantes vos quodam [modo excomm]unicant^a), dum vobis alios communicare non sinunt, et ex hoc iudicari videmini iudicio Iudeorum et qui vobis communicant in predictis illud evenit inconveniens, quod maiorem excommunicationem incurrant, quam excommunicatis communicando fuerant incursuri. Quare nobis humiliter supplicastis, ut providere quieti vestre super hoc paterna sollicitudine curaremus. Nos igitur vestris supplicationibus inclinati, ne quis predictorum huiusmodi sententias in fraudem privilegiorum apostolice sedis decetero promulgare presumat, auctoritate presentium inhibemus, decernentes eas, si per presumptionem cuiuspiam taliter promulgari contigerit, irritas et inanes. Nulli ergo omnino hominum liceat hanc paginam nostre inhibitionis et constitutionis infringere vel ei ausu temerario contraire. Siquis autem hoc hattemptare^b) presumpserit, indignationem omnipotentis dei et beatorum Petri et Pauli apostolorum eius se noverit incursurum. Dat. Lugduni, III kl. februar. pontificatus nostri anno octavo.

Source Fulltext: Chartularium Sangallense III, Nr. 1458, S. 349.