Innocentius episcopus servus servorum dei venerabili fratri . . episcopo Metensi¹ salutem et apostolicam benedictionem. Quia occasione discordie super pluribus et diversis articulis inter venerabilem fratrem nostrum . . Con||stantiensem episcopum² et dilectum filium . . abbatem monasterii^a) sancti Galli³ Constantiensis diocesis dudum exorte nonnulle interdum^b) suspensionis et excommunicationis sententie in ipsos et alios promulgate ac non||nulli monachi et clerici suis locis administrationibus officiis ecclesiis et beneficiis spoliati seu privati fuisse dicuntur, nos ad tollendum inter eosdem episcopum et abbatem dissensionis || et turbationis materiam tibi super eorum causis et questionibus alias sub certa forma litteras destinamus. Verum quia firme pacis vinculo ipsos uniri cupimus et subduci ac precidi omnia, que possent illius bonum et comodum impedire, volumus et presentium tibi auctoritate mandamus, quatinus per te vel per^c) alium omnes huiusmodi sententias, sive per dictum episcopum propria sive^d) per alios quacumque auctoritate sive sedis apostolice sive legatorum ipsius^e) seu quacumque alia prolate fuerint, relaxare ac Processus quoslibet tam per magistrum Corradum^f) scolasticum Argentinensem⁴ quam per quoscumque alios pro alterutra partium contra reliquam quavis auctoritate habitos revocare seu irritare procures, eosdem episcopum et abbatem auctoritate nostra ad eum statum, in quo erant, priusquam orta esset inter^g) ipsos discordia vel aliqua in eos hoc pretextu prolata sententia, reducendo. Siqui vero predictarum sententiarum occasione irregularitatem aliquam contraxerunt, cum eis super hoc eadem auctoritate dispenses. Clericos autem, quos a tempore prefate discordie spoliatos illius occasione fore constiterit ac etiam monachos salva ordinis disciplina ad loca administrationes officia ecclesias^h) et beneficia, que prius habuerantⁱ⁾, restituere plenarie non postponas. Quod si alique ecclesie ad presentationem seu collationem predicti abbatis spectantes, quarum collatio per vacationem diutinam non extitit auctoritate Lateranensis concilii⁵ ad eundem episcopum devoluta, per ipsum post eandem discordiam collate fuerunt vel si quas, postquam vacaverunt, infra tempus in eodem determinatum concilio non concessit, illas prefato abbati restitui facias per ipsum, prout ad eum pertinet libere ordinandas. Ad hec volumus, quod idem abbas monasterium Rinaugense⁶ Constantiensis diocesis commendatum retineat usque ad nostre beneplacitum voluntatis, ita tamen, quod ipsi episcopo tamquam diocesano de iuribus episcopalibus pro eodem monasterio plene respondeat, ut tenetur, quodque debitum ibi deo exhibeatur obsequium, prout fieri consuevit, et bona ipsius monasterii alienata illicite ad ius et proprietatem eius legitime revocentur. Contradictores autem, siqui fuerint, aut rebelles monitione premissa auctoritate nostra appellatione remota compescas, non obstante, si predictis episcopo et abbati vel quibuscumque aliis personis a sede apostolica sit indultum, quod interdici suspendi vel excommunicari non possint per litteras apostolicas plenam de ipso indulto vel expressam de ipsius tenore de verbo ad verbum mentionem minime facientes, et constitutione de duabus dietis edita in concilio generali. Dat. Asisii⁷, III id. maii, pontificatus nostri anno undecimo.

Source Fulltext: Chartularium Sangallense III, Nr. 1509, S. 379-380.