. . abbati monasterii sancti Galli¹ Const(antiensis) diocesis. Non minus acceptum est nobis quam debitum sic ecclesie filiis dispensare munera gratiarum, ut illarum pretextu cuiquam nec preiudicium accedere nec dampni materia valeat imminere. Cum igitur, sicut petitio tua nobis exhibita continebat, venerabili fratri nostro . . episcopo Const(antiensi)² duxerimus indulgendum, ut ecclesias et beneficia ecclesiastica cum cura vel sine cura, personatus vel dignitates sue civitatis et diocesis ad quorumcumque presentationem seu collationem pertinentia, que persone institute in eis in manibus ipsius episcopi resignaverant, et quod unicum quod maluerint beneficium cum cura vel sine cura quocumque legitimo modo vacans et ad cuiuscumque capituli seu conventus predicte diocesis presentationem vel collationem pertinens, non obstante^a) contradictione cuiuscumque patroni electoris presentatoris vel ab eis instituti electi seu presentati sive qualibet indulgentia sedis apostolice seu legatorum ipsius, que indulgentiis huiusmodi obstare possit quibuscumque ecclesiis vel personis concessa, libere valeat ordinare, nos eius^b) supplicationibus inclinati super hoc tibi providere volentes, ut eedem indulgentie ad ecclesias et beneficia, quorum presentatio vel donatio ad te pertinere dinoscitur, extendi non possint neque iuri tuo aut presentatorum a te, quo minus presentatio vel collatio per te facta teneat, preiudicium aliquod valeant generare, tibi auctoritate presentium indulgemus. Nulli etc. nostre concessionis etc. Dat. Asisii³ V. kl. iunii anno XI°.

Source Fulltext: Chartularium Sangallense III, Nr. 1511, S. 381.