Innocencius episcopus servus servorum dei venerabili fratri episcopo Mettensi¹ salutem et apostolicam benedictionem. Dudum sicut accepimus inter venerabilem fratrem nostrum Constan(tiensem) episcopum² et dilectum filium abbatem monasterii sancti Galli³ Const(antiensis) diocesis super Castro de Rinegg⁴ et nonnullis articulis questione suborta, demum fuit hinc et inde in dilectos filios Gielonem de Glarebure^a)5 et Herdeginonem de Haidiwere⁶ laicos super hiis tamquam in arbitros iuramento prestito concorditer compromissum, qui super castro eodem et quibusdam ex ipsis articulis questione indiscusse dimissa, super reliquis quoddam inter partes arbitrium protulerunt, inter cetera in arbitrio mandantes eodem, quod dictus abbas ducentas marchas argenti prefato episcopo pro dampnis et iniuriis illatis eidem persolveret, de quibus licet quadraginta marchas idem abbas postmodum episcopo iamdicto persolverit, de residuo tamen sibi satisfacere non curavit. Super hiis igitur ad pacem et concordiam eorundem episcopi et abbatis sollicite providere volentes fraternitati tue per apostolica scripta mandamus, quatenus per te vel per alium prefatis arbitris inhibere procures, ne de questione castri predicti et aliorum articulorum, de quibus minime arbitrati fuerant, se decetero intromittant, eorum arbitrio circa ea, super quibus processerunt, in suo robore permanente, predictum autem abbatem ad solvendum sine difficultate qualibet prefato episcopo residuum premissarum ducentarum marcharum videlicet centum et sexaginta marchas monitione premissa per censuram ecclesiasticam appellatione remota compellens, de predicto castro, an ad ipsum episcopum vel Const(antiensem) ecclesiam, an ad eundem abbatem vel memoratum monasterium de iure pertineat, inquiras, vocatis prius partibus, sive postea compareant sive non, de piano^a) et absque omni preiudiciali strepitu sollicite veritatem et de hoc plene inquisito et cognito questionem huiusmodi, si partes ipse voluerint, iudicio vel concordia studeas terminare, alioquin inquisicionem, quam super hoc feceris, in scriptis redactam et negotium sufficienter instructum ad apostolicum remittas examen, prefigens eisdem partibus terminum peremptorie competentem, quo per se vel per procuratores ydoneos nostro se conspectui representent iustam super hoc auctore deo sententiam recepture. Super reliquis vero articulis, de quibus arbitrium non extitit, si de illis partes coram te noluerint experiri, audias causam et eam vel iudicio aut concordia termines vel ad nos remittas instructam^b), sicut tibi de alia iniungimus questione, contradictores auctoritate nostra appellatione postposita compescendo, non obstante, si predictis episcopo et abbati vel quibuscumque aliis personis a sede apostolica sit indultum, quod interdici suspendi vel excommunicari non possint per litteras apostolicas plenam de ipso indulto vel expressam de ipsius tenore de verbo ad verbum mencionem minime facientes et constitucione de duabus dietis edita in consilio generali. Datum Anagnie⁷, XII kl. iulii, pontificatus nostri anno undecimo.

Source Fulltext: Chartularium Sangallense III, Nr. 1514, S. 385.