. . plebano ecclesie de Wile¹ Constantiensis diocesis. Cum, sicut nobis exponere curavisti, in civitate et diocesi Constantien(si)^a) de consuetudine, que corruptela dicenda est potius, habeatur, ut omnes usurarii homicide et incendiarii manifesti, quantumcumque^b) satisfactionem plenariam et penitentiam egerint de commissis, cum decedunt, eorum corpora tradi non debeant ecclesiastice sepulture, nobis humiliter supplicasti, ut parrochianis ecclesie tue et aliis, qui apud eandem ecclesiam sibi elegerint sepulturam, et^c) providere super hoc paterna diligentia curaremus. Nos igitur tuis supplicationibus inclinati, ut illorum corpora, cum decedunt, qui se apud predictam ecclesiam elegerint sepeliri, si tibi constiterit eos super hiis, que circa predicta commiserant, satisfactionem plenariam prestitisse, consuetudine huiusmodi non obstante libere apud eandem ecclesiam facere valeas sepeliri, auctoritate tibi presentium indulgemus. Salva tamen canonica portione illarum ecclesiarum, a quibus defunctorum corpora assumuntur. Nulli etc. nostre concessionis etc. Dat. Anagnie² X. kl. octobr. anno I°.

Source Fulltext: Chartularium Sangallense III, Nr. 1535, S. 397.