Universis presentem paginam inspecturis Berchtoldus dei gratia abbas¹, Mangoldus decanus² totusque conventus monasterii sancti Galli salutem in omnium sal||vatore. Que geruntur in tempore, ne simul labantur cum tempore, memoria et apicibus scripturarum solent perhennari. Noverit igitur tam presens etas quam futu||ra posteritas, quod nos ad ampliandam religionem et divini servicii cultum, quem semper promovere volumus et intendimus, humili etiam supplicatione fidelium permoti, re||ligioso conventui sororum seu monialium in Tennikon³ Cyst(erciensis) ordinis instituta servantibus, quas dilecti in Christo Eberhardus de Bichilnse et Eberhardus filius⁴ eiusdem milites ecclesie nostre ministeriales zelo domus dei divinitus inspirati nostro consensu accedente dotaverunt ibidem et instituerunt, presentibus concedimus, permittimus et licenciamus, ut de bonis sive possessionibus predialibus seu feodalibus ministerialium monasterii nostri sive infeodatorum nostrorum nobilium titulo emptionis, donationis, elemosine seu permutationis possessiones seu bona cum suis redditibus sive proventibus ad valorem tantum decem marcharum annuatim ponderis terre nostre ad ius et utilitates proprias recipere valeant et habere ac perpetuo, id est quamdiu canonem solverint, possidere, salvo quod in territorio urbium et munitionum nostrarum immediate ad nos spectantium predicta gratia locum non habeat, et quod tempore contractus a nobis vel ab eo, qui pro tempore fuerit abbas, specialiter debeant gratis et sine difficultate qualibet investiri, inponendo tamen singulis predictis possessionibus in recognitionem originalis respectus a monasterio nostro tracti modico censu pro arbitrio inponentis dicto monasterio nostro in festo beati Galli annis singulis persolvendo. Ut autem premissa omnia apud posteros noticiam habeant meliorem et evidentiam pleniorem, presens instrumentum sigillis nostris abbatis videlicet et conventus de communi omnium nostrum beneplacito predictis religiosis in testimonium veritatis fideliter duximus roborandum. Actum in ambitu monasterii nostri anno domini M°.CC°. sexagesimo, II. kl. februarii, coram testibus subscriptis reverendo videlicet in Christo Ro^vdulfo abbate⁵, fratre Thoma capellano eiusdem de Capella, magistro Ro^vdulfo de Essching(en) canonico Basiliensi⁶, Burch. de Rinegge canonico Episcopaliscelle⁷, item hiis militibus Walthero de Lanidesperch⁸ et Eberhardo socio eiusdem, item Gu^ootmanno nostro camerario, Johanne de Trasendingen⁹ et aliis multis fide dignis.

Source Fulltext: Chartularium Sangallense III, Nr. 1622, S. 452-453.