In dem namin diz vattirs vnd^a) sunis vnd dis heiligin geistis. Suln alle die wissin, die disin brief an sehint, daz her Rv^odolf von Ror||schach von sinis vattirs gv^ote Egilolue sinin brv^odere¹ gap din vierdinteil des gv^otis, des er imme zirehte teilin solte. Vnd sint daz div || gv^ot, div hic nach gischribin stant, div Egilolue sint wordin zi rehtim teile nach ir beidir frivnde rat vnd ouch nach der livte sage, die || vmb ir beidir teil gisworn hattin. Daz ist der hof zi Tivfinbach², livte vnd gv^ot mit allime rechte, daz ist vier phunt phenninge von der altun vogitstivre in dem houe zi Rorschahc. Vnd sol man ouch wissin, daz her Rv^odolf Egilolue sinem brv^odere ouch gab drizic mark vur din vierdinteil sinre burc zi Rorschach, alse si ouch in an kam von sinen bru^odiren zi rechtime teile, vnd gab imme o^vch zwenzik mark vur eine huobe, die er imme ouch solte han gigebin zi rechtim teile. Da bi sol man ouch wissin, daz der selbe Egilolf sich het vurzigin mv^otwillecliche teilis widir sinem brv^odir her Ru^odoluen an Jacobe hern Rv^odoluis amman, an Diethelme von Golda³, an Cv^onrate Liupman, an Rv^odolue dime Hamere vnd an den hagistolzen zi Rorschach, mit wibin vnd mit kindin, die hie ginemit sint, also daz her Rv^odolf die selbin sol Egilolue widerlegin, als in her Cv^onrat von Ramiswac⁴ heizit vnd dir Schenke von Landegke⁵. Vnd sol man wissin, daz her Rv^odolf ist gischeidin uon Egilolue sinem bruodere mit rechteme teile an liuten vnd an gv^ote, wan alleine vmbe die edilin livte, die ir vattir warin, vnd umb die manlehin, die man uon ir vattir hatte, vnd ane die hagistolze, die hie niht vzginomin sint. Diz gischach vor dim appite Berhtolde⁶ zi geginwirtiv hern Heinrich von Valkinstein⁷, hern Rv^odolue uon Guttingin⁸, hern Heinrich uon Griezinberc⁹, hern Arnolde uon Bivrgelon¹⁰, hern Heinriche uon Rauinsburc¹¹, hern Egilolue von Rosinberc¹² vnd hern Egilolue von Rosinburc¹³, hern Cv^onrat von Ramiswak⁴, hern Heinriche dim Schenkin⁵, hern Wilhelme von Steina¹⁴, hern Goeswine von Emiz¹⁵, hern Cv^onrat von Griminstein¹⁶, dim marschalke uon Valkinstein¹⁷, hern Bertholde von Annewiler¹⁸, hern Hermanne von Grv^oninstein¹⁹, zwein von Edankiswiler²⁰, hern Egilolue von Palus²¹, hern Heinriche von Tunretun²², hern Huge von Eschinze²³, hern Rv^odolue von Rinegke²⁴, hern Wezzil Snoede²⁵, hern Hartmanne von Nidirndorf²⁶. Dise sint des gizivge, daz diz gischach, vnd sahinz vnd hortins. Darzv^o ist disiv gischiht bistetet mit appit Bertholdis brieue vnd mit sineme ingisigele.

Source Fulltext: Chartularium Sangallense III, Nr. 1652, S. 475-476.