. . abbati monasterii sancti Galli¹ Constantiensis diocesis. Meritis laudabilis conversationis et vite dilecti filii Wernheri dicti Stori² clerici tui Constanciensis diocesis deberi percepimus, ut in hiis, que sunt favoris et gratie, nos sibi propitios gaudeat invenisse. Hinc est, quod nos eundem Wernherum nullum ut asserit benefitium ecclesiasticum assecutum obtentu meritorum^a) suorum huiusmodi ac precum, quas nobis pro ipso cum instantia porrexisti, gratiose prosequi ac favorabiliter intendentes mandamus, quatinus eidem clerico^b), si est idoneus aliudque canonicum non obsistat, de aliquo benefitio ecclesiastico prebendali vel alio ad cuiuscumque ecclesiastice persone collationem seu presentationem spectante, si vacat ad presens in civitate vel diocesi Constancien(si) vel quamprimum ad id se facultas obtulerit, per te vel per alium providere procures, faciens ipsum in ecclesia, in qua sibi duxeris providendum, si collegiata fuerit, in canonicum recipi et in fratrem, dummodo aliquis benefitium vel prebendam pertinentem ad collationem vel presentationem eiusdem ecclesie vel persone per nostras litteras non expectet^c). Non obstante statuto de certo canonicorum numero iuramento confirmatione sedis apostolice vel alia qualibet firmitate vallato, seu si aliqui super provisione sibi facienda de benefitiis ecclesiasticis in illis partibus generales seu speciales predecessorum nostrorum Romanorum pontificum aut legatorum sedis eiusdem litteras impetrarunt, quibus per hoc nullum volumus preiuditium generari, aut si aliquibus a sede prefata indultum existat, quod ad receptionem vel provisionem alicuius compelli aut excommunicari suspendi vel interdici non possint vel quod alius nequeat de benefitiis ad eorum collationem vel presentationem spectantibus aliquibus providere per litteras apostolicas non facientes plenam et expressam ac de verbo ad verbum de indulto huiusmodi mentionem, seu alia qualibet ipsius sedis indulgentia, per quam effectus presentis gratie impediri valeat vel differri. Contra(dictores) etc. usque compescendo. Proviso, quod idem clericus, prout requiret onus beneficii, de quo sibi providendum duxeris, se fatiat statutis temporibus ad ordines promoveri^d) et personaliter resideat in eodem. Alioquin huiusmodi gratia nullius penitus sit momenti. Dat. apud Vrbemueterem³, III. idus april. anno t[er]tio^e).

Source Fulltext: Chartularium Sangallense III, Nr. 1731, S. 517-518.