Bertholdus dei gratia abbas sancti Galli¹ universis Christi fidelibus presentium inspectoribus subscripte rei noticiam cum salute. || Humana labente memoria et crescente cupiditatis malicia expedit ea, que geruntur, ad obviandum litibus scripture testimonio || perhennari. Noverint igitur, quos nosce fuerit oportunum, quod cum dilecti nostri Waltherus de Lantsperch² et Waltherus filius suus³ milites || ministeriales ecclesie nostre curiam suam sitam in villa de Tennincon⁴ solventem annuatim triginta duos modios tritici mensue^b) de Wila⁵ religiosis in Christo . . abbatisse et conventui monasterii de Tennincon⁶ Cysterciensis ordinis Constantiensis dyocesis cum omnibus iuribus et attinentiis suis vendere intenderent nec id sine nostro consensu legitime perficere possent, nobis humiliter supplicarunt, quatenus predictam curiam cum pertinentiis suis videlicet domibus, areis, agris, terris cultis, incultis, nemoribus, virgultis, pratis, pascuis, aqueductu et decursu aquarum et universis communitatibus omnique districtu seu quibuslibet bonis, que ad premissam curiam spectare dinoscuntur, de manibus ipsorum nobis resignatam, prefatis religiosis, qui^c) eisdem scilicet Walthero et filio suo Walthero sexaginta marchas et amplius puri et legalis argenti ponderis Constantiensis pro predicta curia dederant, conferre et donare dignaremur libere perpetuo possidendam. Nos ipsorum precibus pium prebentes assensum prefatam curiam, sicut premissum est, ipso etiam Walthero milite iuniore patre suo defuncto, cum nondum aliquos liberos habuerit, nobis eandem curiam totaliter resignante, supradictis religiosis de Tennincon ad petitionem eorundem donavimus et assignavimus cum omnibus suis iuribus, sicut predictum est, libere et quiete perpetuo possidendam et habendam. Huius rei testes sunt: magister Andreas de Willeberc⁷, Eberhardus dapifer de Bichelnse⁸, Cv^onradus de Geisberc⁹, Burchardus et Cv^onr. fratres de Einwiler¹⁰, Hugo de Eshenze¹¹ milites, V^olricus et Waltherus de Lo^vnberc¹², Diethelmus de Mose¹³, H. de Tvsnanc¹⁴, Eber. de Loemeis¹⁵, Waltherus de Bvnishouen¹⁶, C. de Cvria et alii fide digni. In cuius rei testimonium presentem litteram sigilli nostri munimine roboramus. Ego vero prenotatus Waltherus de Lantsperc omnia premissa ad meam petitionem profiteor esse facta et conscripta ac supradictum argentum mihi et pie recordationis patri meo Walthero fore integraliter persolutum. Ad maiorem etiam cautelam presentium tenore me meosque heredes et universos successores meos obligo ad veram warandiam omnium premissorum sepefatis religiosis prestandam, ubicumque ab ipsis fuerimus requisiti. Ut autem premissa nullius cavillationis ingenio valeant irritari, presenti littere sigillum meum cum sigillis predicti domini mei Ber. dei gratia abbatis sancti Galli et Eber. patruelis mei de Bichelnse dapiferi sancti Galli duxi firmiter apponendum. Actum apud Wile⁵, anno domini M°.CC°.LX°V°. mense aprili.

Source Fulltext: Chartularium Sangallense III, Nr. 1748, S. 528-529.