Beneplacitum esse credimus divinae clementiae ss. reliquias debitis honoribus venerari et eorum oracionem specialius nostris applicare servitiis, quos familiarius invocantes intercessores peccatorum nostrorum esse cupimus in caelis. Hac ergo inspecta ratione nos divina ordinante clementia coenobii sancti Galli regimen tenentes¹ ad peticionem spiritualis fratris nostri Lutheri duo luminaria in capella sanctae dei genitricis Mariae et in superiori capella, quae in honore sancti Salvatoris² dedicata est, ex quadam decima, quae singulis annis colligitur in Blasinberch³, institui dignum duximus, eidem institucioni hoc superaddentes, quatenus iam dictas capellas cum praedicta decima presbyter claustralis semper assignatas habeat, qui ad minus semper in ebdomada in unoquoque trium altarium missam celebrare non negligat et luminaria singulis noctibus constituta utrobique collocare non obmittat. Hanc ergo decimam, quam ob remedium animae suae praedictus frater noster Lutherus a manu laici permissione nostra pia ductus intencione comparavit, ita huic nostrae constitucioni accommodamus, quatenus de caetero ultionem sanctorum certissime timere debeat, si quis de posteris nostris hanc ab hac institucione auferre intendat. Facta sunt autem haec anno ab incarnacione domini MCLXXXVIII, praesidente domino Vdalrico mitissimo atque piissimo abbate¹, communi capitulo consentiente.

Source Fulltext: Chartularium Sangallense III, Nr. 953, S. 59.