Albertus dei gratia abbas monasterii Augensis venerabilibus et in Christo dilectis . . abbatisse et conventui monasterii de Maggenowe ordinis Cy||stertiensis salutem et perseverantem in dei obsequio voluntatem. Quotiens opus agitur pietatis, dignum est scriptis id memorialibus roborari, || ut et quod agitur stabile perseveret et alii provocentur exemplo simili ad virtutem. Recogitantes igitur nos olim intuitu retributionis divine et || ut participationem bonorum omnium, que apud vos fiunt, specialius consequeremur, vobis de communi consensu et unanimi voluntate totius conventus nostri monasterii indulsisse, ut possetis de possessionibus ad ius et proprietatem predicti monasterii nostri^a) pertinentibus per donationem seu emptionem acquirere et licite ad usus vestros retinere usque ad summam decem mansuum, sicut in instrumento vobis et monasterio vestro super hoc a nobis dato continetur¹, ecce curiam sitam in Mettindorf, quam tenuit ab ecclesia nostra illustris vir R. comes de Habesburg in feudum, eratque ab eodem comite Conr. miles dictus Giel de Glatteburg infeudatus de eadem, post resignationem debitam factam ab eisdem feudatariis aliisque habentibus ius aliquod in ipsa in manibus nostris vobis et monasterio vestro donamus et assignamus in nomine domini cum omnibus pertinentiis suis computandam in summa predictorum decem mansuum et sub annuo censu olim eisdem mansibus imposito in perpetuum possidendam, sperantes id tanto licentius ac salubrius fieri, quanto confidentius divine maiestati complacere novimus, si id, quod est spiritale aut spiritali annexum, de manibus laicorum ad usum ecclesiasticum revertatur. In cuius rei testimonium et robur firmitatis perpetue presentem cartam vobis damus sigilli nostri robore communitam. Actum et datum apud sanctum Gallum, VIII. kl. ianuar. anno domini MCCLXVII. inchoante², indict. X. pontificatus domini Clementis pape IIII^ti. anno secundo.

Source Fulltext: Chartularium Sangallense IV, Nr. 1778, S. 12-13.