Allen Christglöubigen mentschen, so disen brief ansechen, thůn ich H. ritter von Werdegg^a)1 zu wisßen vnnd kunth allermengklichem, das ich vmb miner ouch mins brůders Ru^edgers seeligen² seelen heyl willen mit gunst vnnd erloubung deß erwürdigen herren Růdolffen von gottes gnaden erweiten bischoffs zů Constantz³, ouch mit wisßen vnnd willen deß erwürdigen vnsers herren appts zů Sanct Gallen⁴ vnnd R. deß lütpriesters der pfarrkilchen zů Pfäffigken⁵ vff dem altar zů der rechten syten inn ersternempter kilchen zů Pfäffigken gelegen eyn pfrůnd gestifftet hab. Vnnd damit mir vnnd H. mins brůders seeligen sun^b)6 vnnd vnseren erben oder ouch dem lütpriester vnnd dem pfru^ender ald caplanen, so ye zů zyten der enden gott dienen werden, nit ettwas beschwärde haruß entstande, so will ich mit nachgeschribenen Ordnungen söllichen irrungen, souyl ich mag, begegnen, setze deßhalb vnnd will, so erst dieselb pfrůnd ledig wirt, das dann die lychung derselben pfrůnd erstgenemmptem mines brůders seeligen sun vnnd nach demselben dem elteren sun, der von min oder deselben mins brůders seeligen suns gschlecht sin wirt, nun hinfür fry gehören vnnd zůständig sin sölle. Vnnd ob der leechenherr, so die pfrůnd leedig one eehafftig vrsachen an siner lychung sümig vnnd die pfrůnd innert vierzig tagen eynem priester oder der noch im selben jar zů priester gewycht werden möchte, nit lychen wurde, so soll dann der jünger vnnd der am alter der na^eher nach im ist, die lyhung dasselb maal beziechen, vnnd so denn die lyhung dergstalt eynmaal beschechen ist, soll allßdann dieselbe, so die pfrůnd wider leedig wurde, fry widerumb an den elteren sun fallen. Ich setz vnnd will ouch, das we^ader ich noch mins brůders sun noch vnsere eerben dem caplanen von diser leechenschafft ald leechen rechtens wegen eyniche schatzung vffleggen ald ime ützit abnemmen söllen. Min will ist aber, das der pfru^ender ald caplan am mentag für die abgestorbenen vnd an dem sampstag von vnser lieben fro^uwen inn obgenannter kilchen (er syge dann mit redlichen vrsachen verhindert) eyn ma^eß haltten, doch solle im vber vier pfenning wider deß lütpriesters willen von dem gefallenen opfer nit zůgehören. Item der pfru^ender ald caplane soll dem lütpriester an den hochzytlichen festen inn den göttlichen a^empteren zůdienen ald beholffen sin vnnd vff dieselben fest oder vff vnser lieben fro^uwen, der heyligen zwölffpotten oder den suntagen vff dem alter gedachter pfrůnde keyn maß haben dann mit deß lütpriesters verwilligen. Item der pfru^ender ald caplane soll deß lütpriesters, so er vff den synodum gadt, vntz er komenlich wider heym kommen mag, verwäser ald statthalter sin, doch das er das opfer, so er mitler zyt empfacht, dem lütpriester behalte, der lütpriester aber erlaßt den caplanen, so er die pfrůnd selbs besitzt, deß veech vnd deß gartten zechendens. Item der caplan soll selbs personlich vff der pfrůnd wonen, diewyl er doch vß eygnen gülten wol geleben vnnd sin vßkommen gehan mag, vnnd sich vber zweyntzig tag one schynbare notturfft von der pfrůnd nit vsßeren. Vnnd ob sich fu^egen, das der caplan mit eyner annderen gnůgsamen pfrůnd versechen wurde, so ist dise caplany leedig. Er soll ouch dem lütpriester vnderwürflich syn inn göttlichen diensten. Vnnd also versprich ich H. der ritter von Landenberg^c) jetz leechenherr der kilchen zů Pfäffigken, alle dise ding, wie sy vorgeschriben stand, waar vnnd stät zů halten. Vnnd sind diß der obgedachten pfrůnde gültten zů Ober Hittno^uw⁷ von eynem hof sechszechen stugk, item von eyner schůppiß^d) daselbst VII stugk, item von zweyen hofstetten^e) daselbst zwen mütt kernnen, item daselbst von wylent Eberhart von Thurstadlen^f)8 agker eyn mütt kernen, item von eyner hofstatt eyn mütt haber vnnd von eynem bla^etz by der cappellen daselbst eyn vierteyl kernen, item zů Bäretschwyler^g)9 zwey stugk, item zů Nider Hittnow¹⁰ von zweyen schůppißen^e) vierzechen stugk, von dem gůt zum nußboum zwey stugk, item zů Türstadlen^h) sechs vierteyl kernnen, zů Vrental¹¹ eyn pfund, zů Blyderotschwylⁱ⁾¹² anderthalb stugk vnnd zů Pfäffigken von zweyen hofstetten^k) eyn müt kernnen vnnd der zechenden daselbs dry Schilling. Vnnd damit dise ding vnzergengklich eewigclich blyben, hab ich disen brief mit der erwürdigen miner lieben herren Růdolffen erweltten bischoffs zů Costantz vnnd deß appts zů Sanct Gallen, deßglychen herren H. propsts zů Sanct Steffan zů Constantz¹³, darzů deß lütpriesters vnnd H. sines vatters¹⁴ leechenherrens zů Pfäffigken vnnd minem insigel besiglen lasßen, der geben ist zů Constantz inn dem jare deß herren M°CC°LXXV. IIII° kl. aprilis^l), der dritten Römer zinßzal inn diser nachgenemmpten gegenwürttigkeyth, nemlich H. propsts zů Sanct Steffan, Walthers von Kilchen¹⁵ corherren daselbs, H. von Landenberg¹⁴, R. von Roschach¹⁶, Conradts von Annwyler¹⁷ ritteren, her Hanßen caplanen diser caplany vnd H. von Landenberg¹⁸ der gewychten.

Source Fulltext: Chartularium Sangallense IV, Nr. 1947, S. 123-125.