Ez sun wizzen alle, die disen brief iemer gesehent alde geho^erent lesen uor gerichte aide âne gerichte, daz ich^a) Johannes Ovgeli¹ burger uon sante Gallen || dien armen lvten in dem nidern spitale ze sante Gallen² zewene mine zehenden, der eine heizet ze No^evchelnhus³, der ander heizet amme Chaphe⁴, ze chovfenne || han geben mit alleme rechte umbe zehen march lo^etigis silbers Chostencer giwegis. Vnde han daz getân mit mins herren abbt V^olrichs⁵ vnde de^b) conuen||tis uon sante Gallen willen vnde gunst, âne achust vnde âne alle giuerde mit gv^oten willen vnde mit gv^oten triwen, vnde enzvhe ovch mich an disen^b) brieue aller der ansprache vnde der wideruorderunge, die ich alde min erben iemer gewinnen mochten an disen zewein zehenden, vnde uergihe ovch des an diseme brieue, daz ich ir were wil sin, als ich ze rechte sol, der zeweier zehenden, swa sis bidurfen uor gerichte alde âne gerichte, vnde dc ich die selben zehen march enphangen han uon inen vnde daz ich si bewendet han an die stat, da ich wol bedorfte. Vnde uon dien selben zewein zehenden sol man iemer me jergelich an sante Gallen tage geben ein halbiz phunt wachsis an daz Hecht des gotshuses. Dirre chovf vnde diz gedinge beschach ze sante Gallen, da die waren, der namen hie nach geschriben stant: her V^olrich Lesti, her Gêrwig der Peier⁶, her Heinrich der Blarrer, Chv^onrat der Meier, Heinrich Ovgeli, Johannes Chuchimeister⁷, Heinrich Hurst, Chv^onrat der Wienachter, Chv^onrat der Zehender, Chv^onrat uon Engeciswiler⁸, V^olrich der Burger, V^olrich Wiphe^c), Heinrich von Watt^c)9 vnde ander genv^oge, in deme jare, do uon gottis geburtage waren tusent vnde zewei hundert vnde sibenzich vnde uunf jar, an sante Bartholomes tage. Vnde daz diz allez deste steter vnde uester belibe, so gibe ich inen disen brief besigelt mit mins herren abbt V^olrichs vnde des conuents uon sante Gallen ingesigele zeinem ewigen vrchvnde.

Source Fulltext: Chartularium Sangallense IV, Nr. 1954, S. 130-131.