In^a) deme namin dis vatirs vnde dis sunis vnde dis hailigen gaistis. Ich Růdolf dir ritter von Rorschach¹ tv^on kunt || vnde vir gihe offinlichen mit dierre hantveste allen den livten, die von disime hivtigen tage si iemer mer gesehent odir geho^erint || lesin, daz ich durch got Iesum Cristum von himilriche swestir Mahtilte dir priolinne von Ranwiller² vnde swestir Gv^otun || dir suppriorinne von Raine³ dir swestiren an dim Bru^ele ze sante Gallen⁴ vnde dar nach dim conuente vnde dir saemenunge allirsamint an dim Brv^ele ze sante Gallen han gegebin von der vndir wisunge des hailigen gaistis wr mich vnde mine erbin allesamint mit gv^otime willen Ebirharten din Merboten von Lanchwattvn⁵, der min waz, mit allime rehte vnde alse ich in han braht vnz an disen hivtigen tach. Vnde virzihe mich dar vbir mit dierre hantvesten vnde mit disime brive wr mich vnde wr alle mine erbin von hivtte disime tage iemir mer allir der anesprache vnde alliz des rehtes, so ich iemir gewinnen mohte an dem selbin Ebirharte an gaistlichime odir an weltlichime gerihte. Unde daz die vorgenanden swesteran vnde iro conuent sich dierre gotlichen gabe vriliche vnde ledechlichen vro^vwen iemir mer, so gib^b) inen dise hantveste ze ainime statten vrkunde besigilt mit minem ysigile ze ainir^c) vestenunge alliz des, so an dierre hantveste gescriben stat. Dis beschach ze sante^d) in dis grauen Willehelmis hus von Montfort⁶, do nach vnsirs herren geburte waeren tusinch vnde zwai hundirt jar vnde sehs vnde sibinzich jare in deme sehsten^e) iare, an deme naehisten maentage nach vzgantir ostirwchen, ze geginwrte mins herren grauen Willehelmis von Montfort, dis hern Cv^onratis dis briestirs von dir schv^ole, Hainriches dis kilichherren von Rivti⁷, dis hern Hainriches vnde dis hern Burch. der rittere vnde gebrůdir von Wartinsê⁸, Cv^onratis von Raine vnde andirre erbaerre livte phaffon vnde layen.

Source Fulltext: Chartularium Sangallense IV, Nr. 1966, S. 140-141.