In^a) gotis namen amen. Wir^b) Rv^omo von gotis gnadon der abbit¹ von sante Gallen vnde allir der conuent des selbin gotteshuses kunden || allen den, die disen brief lesint alde ho^erint, dierre dinge, die hie nach gescriben stant, aine warhait. Wan^b) bedarf wol, daz man div dinch || mit brieven vnde mit gezivgen staetecliche wernde mache, div staete vnde ewekait ane alle wider rede haben sont. Da^b) von so tv^on wir kunt || allen den, die nv sint aide her nach geborn sont werdin, daz wir mit gemainime rate, dem^c) man ze susgetanen dingen nach gewonhait alde nach rehte haben sol, vmbetwngenliche mit vrien willen, wan wir daz bewnden han mit ainwelligime rate, daz es in manege wis vns vnde vnsirme gotteshuse vnde o^vch vnsiren nach komen bezzir getan ist danne vermitten, hern V^olriche von Rameswag² vnsirs gotteshuses dienistmanne, der vnsirme gotteshuse dike nuzliche het gedienet vnde noch gedienen mach, vnde allen sinen liberben, die nv sint alde her nach von ime geborn werdint, die burch ze Blatton³, alse div rinchmure vmbevangen hat, den hof ze Waltkiliche⁴ mit livten, mit gv^ote, mit kilichen sazze vnde mit allime deme rehte, so dar zv^o ho^erit, lihen vnde haben gelihen ze rehtime burchlehine ledecliche vnde laere hinnan wr ze besizzinne ane alle anesprache vnde ane alle wider rede, mit allen den worten vnde den gebaerden, die man bedarf ze susgetanen lehin nach rehte alde nach gewonhait. Vnde sont siv die selben burch ze Blatton bewarn vnde behv^eten, alse burger von rehte sont. Vnde sol o^vch div selbe burch deme gotteshuse vnde deme abbite von sante Gallen offen sin ze allen den no^eten, so siv ir bedurfen, in allim deme rehte, so ain burger von sinime burchlehene ze rehte tv^on sol. Doch^b) so nemen wir vs alle die livte, die in deme cile, do wir deme vorgenanten hern V^olriche von Rameswag die burch ze Blatton, den hof ze Waltkiliche vnde der kilichen saz lihen ze rehteme burchlehine, die do in vnseren vestinon mit huse sezhaft waren, daz ist . . dir Schafriter vnde . . dir Swab vnde sin mv^otir vnde V^olrich Dingolf, vbir die hat herre V^olrich von Rameswag vns vnde vnsirme gotteshus gegebin sin mayrampt. Dar^b) zv^o so binden wir vns vnde vnsir nach komin mit gemainime rate vnde vnsir gotteshus ewecliche, es si ain Ro^emescher kaysir alde Ro^emescher kunich odir niht, daz wir deme vorgenanten hern V^olriche von Ramiswag vnde sinen liberbon an der vogetaye des vorgenanten hofes ze Waltkiliche odir an der kilichensazze odir an dekainen dingen, div dar zv^o ho^erint, mit nivte sont ierren an gerihte noch ane gerihte, wir noch nieman von vnsirn wegen, mit worten noch mit werken noch mit dekainir slahte dingen. Wir vnde vnsir conuent allir gemainliche virgeben o^vch deme vorgenanten hern V^olriche von Rameswag wr vns vnde wr alle vnsir nach komen vnde wr vnsir gotteshus lutirliche allen den schaden, swie er genemmit ist, den er vns alde vnsirme gotteshuse îe getet, vnde uirzihen vns allir der anesprache gen deme dike genemiten hern V^olriche von Rameswag, die wir gen ime hettont des tages, do disiv schidunge ze Rorschach⁵ beschach. Ich^b) V^olrich von Rameswag virzihe mich o^vch allir der anesprache, allir der brieve, allir der hantvesten vnde allir der sichirhait, swie siv namen hant, gen deme gotteshuse vnde deme conuent vnde deme abbite von sante Gallen. Daz^b) abir diz, daz da vor gescriben ist, von vns vnde von allen vnseren nach komen ewecliche staete belibe, so enzihen wir vns wr vns vnde wr vnsir nach komin vnde wr vnsir gotteshus allir der brieve, die wir irworben han alde erwerben mo^ehten von babiste, von kaysirn alde von kunegen alde von dekainir slahte gerihte, gaistlicheme alde weltlicheme, mit deme daz, dc da vor gescriben ist, bekrenchit mohte werden alde widertan, allir gesezzede, allir hilfe, gaistliches alde weltliches rehtis alde gewonhait vnde allim deme rehte vnde schirme vnde o^vch allir der hilfe, mit deme wir alde vnsir nach komen in kainir slahte wis daz, daz da vor gescriben ist vnde gesprochen, mo^ehte verierrit werdin alde bekrenkit alde o^vch sine craft verlieren. Unde^b) ze ainir eweclicher vrkunde allir der worte, die da vor gesprochen sint, vnde o^vch der getat, div da vor beschehen ist, eweclicher staetekait, so henken wir mit gemainime rate vnde mit vrilichime willen wir dir abbit Rv^omo von sante Gallen vnde vnsir conuent vnseriv isigil an dise hantveste. Diz^b) geschach ze Rorschach vf der burch, an dim naehisten sunnuntage vor sante Laurencien tult, do von gottes geburte waren tusench iare vnde zwaihundirt jare vnde siben vnde sibinzich iare in deme sibenden iare^d), da ze gegene waren her Albreht, der von gottes gna(din)^e) abbit ist ze Owe⁶, her Herman von Landinberc dir phaffe⁷, herre Walther von Kilichaim, der da korherre ist in der stat ze Costinze ze sante Stephane⁸, herre Růdolf von Guttingen⁹, herre Růdolf dir Giel¹⁰, herre V^olrich dir Giel¹¹, herre Růdolf vnde dir herre Egelolf die gebrůdir von Rorschach¹², herre Egelolf von Altsteten¹³, her Herman der eltir von Landinberc¹⁴, herre Růdolf von Sulzberch¹⁵, herre Růdolf vnde dir herre Willehelm die gebrůdir von Stainach¹⁶, herre Hainrich vnde dir herre Burchart die gebrůdir de vo^egete von Rineke¹⁷, herre Rů>dolf von Lindinberc¹⁸, herre Wernher von Schinon¹⁹ die rittere vnde ander erbaere vnde bederber livte genv^oge. In deme namen vnsirs herren amen.

Source Fulltext: Chartularium Sangallense IV, Nr. 1992, S. 160-162.