In dem namen vnsers herren amen. Ich grave Friderich von Toggenbvrc¹ kvnde allen dien, die disen brief lesent || alder horent lesen, daz ich dvr got vnd^a) dvr die liebi, die ich ze dem closter ze Maggeno^vwe² han, gigeben han || der abtissinne vnd dem convente vrilichen vnd ledecliche mit allem rehte min eigen ze Mose³, dc Amvr von Hor||wen⁴ von mir hate ze lehen, vnd de eigen, de herre Heinrich der Lo^ewe von Zvcchenriet⁵ von mir hate ze Swarzenbach⁶, vnd dc eigen, dc Heinrich ab Egge⁷ von mir hate o^vch ze Swarzenbach, vnd dc eigen, dc herre Cv^onrat von Mvnchwile⁸ von mir hate in Gebsatal⁹, vnd Heinrichen den Zehender, den herre Eberhart von Bichelnse¹⁰ von mir hate, vnd dc lehen, dc Haertnit von Salwenstein¹¹ von mir hate, dc waz min lehen von dem gotshvse ze O^vwe¹², dc selbe lehen lit in dem dorfe ze Ermv^otingen¹³. Dc gab ich vf ze O^vwe, swc inen von im wart, dc ez inen von dem gotshvse verrihtet wrde. Daz diz war si vnd o^vch ewecliche staete belibe, dar vber han ich disen brief gesigelt mit minen insigil zeinen staeten vrkvnde. Des sint gezvge graue Friderich von Toggenbvrc grauen Craftes svn¹⁴ vnd V^olrich von Bvssenanch¹⁵ vnd Bertolt der Lvbeler vnd Heinrich von Bv^ole¹⁶ vnd V^olrich Sno^ede¹⁷ vnd brvder C. der Giel¹⁸ vnd brv^oder Albreht der Hvne¹⁹ vnd brv^oder H. lo^eche. Dc diz staete belibe, alse da vor gescriben ist, dar vber wart dirre brief gegeben ze der Hohvn Toggenbvrc²⁰ an dem tvsendosten vnd zwei hvndertosten vnd ahzegosten iare nach gottes gebvrte, an dem vierden tage nach der tvlt Mathie apostoli.

Source Fulltext: Chartularium Sangallense IV, Nr. 2044, S. 210-211.