Rudolfus dei gracia Romanorum rex semper augustus universis sacri imperii Romani fidelibus tam presen||tibus quam futuris presentes litteras inspecturis imperpetuum. Cum dive memorie Fridericus secundus Romanorum || imperator et rex Sicilie, prout in suis privilegiis¹ vidimus contineri, venerabili V^oI. abbati sancti Galli² et ecclesie sue ministeriali||bus principum, qui sollempni curie sue apud Vlmam³ interfuere presentes, applaudente consensu promiserit, quod advocaciam in Wanga⁴ vellet perpetuo immediate in suis manibus et imperii continere, nunquam alienandam ab imperio per personam aliquam ecclesiasticam vel mundanam, sic quod eadem advocacia in illius dominio semper debeat permanere, qui pro tempore ecclesie sancti Galli fuerit advocatus, nos eiusdem Friderici imperatoris in hiis, que nostre salutis augmentum respiciunt, sequentes vestigia predictam promissionem seu graciam ratam habemus et gratam ac eam ex plenitudine potestatis regie confirmamus, quamlibet alienacionem advocacie predicte decernentes irritam et inanem. In cuius rei testimonium presens scriptum exinde conscribi et maiestatis nostre sigillo iussimus communiri. Testes sunt hii: venerabiles Heinricus Basiliensis⁵ et Conradus Tullensis⁶ episcopi ac nobiles viri Heinricus de Vurstinberch⁷, Guntherus de Swarzpurch⁸, Bertholdus de Henninberch⁹ comites, Heinricus marchio de Hahperch¹⁰, Hartmannus et Marquardus fratres de Baldecke¹¹ et alii quamplures. Datum apud Columbariam¹², idus octobris, ind. X^a. anno domini millesimo ducentesimo LXXX°. primo, regni vero nostri anno nono.

Source Fulltext: Chartularium Sangallense IV, Nr. 2063, S. 223-224.