In gottes namen amen. Alle die disen brief sehin ald horin lesin, die svln dz^a) wissen, dz || graue Diethelm von Thoggenburc¹ grauen Kraftes seligen² sun vergihet an disem brieue, swc || dc goteshus von Vischinun³ lvt ald gv^ot vntz an disen tac in giwalt vnd^b) in giwer her hat braht || von sinem vater, sinen vethern wnd^c) dar nah allen sinen vordren, dz er dar an enheinis rehtis gihet zihanne noh zi vordirne an geistlichem noh an welthlichem gerihte. Vnd gischeh abir dz, dz der selbe graue Diethelm, der hie vor geschriben stat, vmb lvt ald vmb gv^ot, als hie vor^d) ginemmit ist, dz dz goteshus zi Vischinun des tages, do dis gischah, in giwalt vnd in giwer hatte, vor geistlichem ald welthlichem gerihte ane spreche, di^v ane sprache sol kraft noh maht han noh niemer gewinnen, wan er sich es vertzigen hat in die hant abt Hainr. von Vischinun⁴, der dise selbin vertzignust enphienc an sines goteshuses stat zi Vischinun. Dis sint die getzvge, die dz sahin vnd horthon: her Burkh. de cappellan von Wile⁵, her Huc von Albrehswiller⁶, her V^oI. von Lo^vwenberc⁷, her H. von Vurberc⁸, Peter a der Egge⁹, C. de Mechler, C. der Waldegger¹⁰, E. der Vinke¹¹, C. Ro^vbli, vnd dz allis, dz hie vor geschriben stat, deste vester vnd deste stester^e) belibe, so henkit graue Diethelm von Thoggenburc, der hie vor ginemit ist, sin insigel an disen brief. Dis gischah ze Wile⁵ in der stat in hern Hainr. Mvndlins hus nah vnsers herrin gibvrte thusent iar zwei hundert iar vnd dri vnd hahtzic iar, an dem dvrnstage vor sant Thomas thult vor wihennaht.

Source Fulltext: Chartularium Sangallense IV, Nr. 2111, S. 264.