Allen die disen brief sehend ald horrend lesen, kvnden wir vro Elisabeth greuene von Honberg vnd vro^vwe von Rapreswile¹, || de wir mit vnsers herren vnd wirtes hand grauen Lvdewiges von Honberg² vnd vnser kinden Wernhers, Cyliun^a) vnd Annen³ || willechliche offenliche vnd vriliche vnd mit gemeinem rate Heinrich Abdorf vnserem wirte⁴, der burger ze Zvrich ist, vnd || sinen erben vnser wingarten, die vnser eigen waren, der wingarten einer lid ze Herdiberg⁵ vnd stozet an vnser vro^vwen wingarten von O^etenbach⁶, so ligend zwene ze Heslibach⁷, der einen bvt Heinrich der Wider vnd gibet von des selben wingarten vsgelende zwen mvt kernen ze zinse, den anderen bvt der Sideler vnd Berchtold Kegli von Heslibach, der vierde lid ze Witellinchon⁸, den bvwend die hoflvte von Zollinchon⁹, die selben hoflvte die gebend von dien acheren, die siv bvwend ze Witellinchon, ierlich ze zinse dri mvt kernen, die vorgenanden wingarten vnd dv gv^ot, als da vorgeschriben stat, han wir gegeben fvr lidig eigen dem vorgenandem Heinrich Abdorf vnd sinen erben vmbe hvndert march silbers Zvricher gelo^etes vnd sin des silbers gewert allechliche vnd han o^vch dc silber an vnseren nuz geleit vnd bekert. O^vch svn wir dv vorgenande greuene vnd vnser her graf Lvdewig vnd vnser kind, dv wir iezand samend haben oder noch gewinnen, Heinriches Abdorf vnd siner erben der vorgenanden wingarten vnd gv^eteren wer sin fvr lidig eigen an allen stetten. Vnd dc Heinrich Abdorf vnd sin erben bewart sin an allen dingen vnd dir ko^vf stet belibe, so gebin wir Heinrich vnd sinen erben disen brief besigelten mit vnseren ingesigelen ze einem steten vnd ewigen vrchvnde. O^vch sol man wissen, dc vnser kind genv^eget vnser ingesigelen, wan siv eigene nicht hand, vnd veriehend des an disem brieue offenliche. Diz beschach, do von gottes gebvrte waren zwelfhvndert sechs vnd achzeg iar, an der mitchen vor vnser vro^vwen liechtmes, vf der burg ze der Nvwen Rapreswile¹⁰, do indict. wc XIIII. Bi disem ko^vfe vnd bi dir gift waren ze gegen her Johans von Elwile¹¹ ein priester, meister V^olr. der lvpriester von Walde¹², her Rv^odolf, her Heinrich vnd her Burchart an dem Tvrne¹³ gebrv^odere rittere, her Heinrich der Marchschalch, her Jacob von Rambach der schultheiz¹⁴, V^olrich von Rvti¹⁵, Gotfrid von Bv^obendorf¹⁶, Chv^onrat der voget von Honberg¹⁷, Heinrich von Ebno^ede¹⁸, Heinrich der amman von Rapreswile¹⁹, meister V^olrich der amman von Grifenberg²⁰ vnd ander erber lvte genv^oge, die zv^o disem ko^vfe gelat vnd gebetten wurden. O^vch sol man wissen, dc dir ko^vf mit grauen Hermans²¹ willen vnd rate, an den wir disen ko^vf gesezt hatten, beschehen ist.

Source Fulltext: Chartularium Sangallense IV, Nr. 2155, S. 297-298.