In dem namen vnnsers heren amen. Kund ich her Eberhart von Bichelsee¹ der trucksa^esse von sant Gallen allen den, die disen gegenwurtigen brieff lesent alder ho^erent lesen, dz ich ledeklich vnnd mit allem rechte von mir vnd von allen minen erben ain schůppis ze Nuforen², die da haysset die Zehinda, die min recht aigen was, die han ich gegeben Hainrichen dem Giele von Scho^vwenberg³ ze rechtem aigen ze tragende der a^eptissinen vnnd dem conuent von Maggenowe⁴, den dz vnnd ander gůtt min vatter gab ze kouffen. Ich kund ouch an disem brieffe, dz min wirtine fro Vrsula vffgeben haut Adelhaiden die Zehenderinen vnnd ire kind, die ir morgen ga^vb wa^vren, ledeklich vnnd willenclich vnnd vnbezwungenlich vnnd alle anspra^vch von ir vnnd allen ir erben Hainrichen dem Giel ze rechtem aigen ouch ze tragende der aptissinen vnnd dem conuente von Maggenowe, ir sind die selben lutt widerlait, die sy vfgegeben haut mit V^olrichen dem kellner von Tuffenbrunnen⁵ vnnd siner wirtinen vnnd mit sinen kinden vnnd mit siner můtter vnnd mit allen sinen geswustergiten. Wa^ere aber dz jeman die lutt alder dz gůtt, dz da vorgenemt ist, dem closter alder dem conuent anspra^eche, da von sy ze schaden ka^emint von vnnsern wegen, den schaden sol ich vnnd mine erben inen ab tůn. Dz diß ain wa^vrhait sye, dz da vorgeschriben ist, des sind gezuge herr Cůnrat der lutpriester von Bichelsee vnnd Růdolff von Roschach⁶ vnnd Cůnrat von dem Houe vnnd Hainrich Genseli vnnd Gerbolt der amman vnnd dirre brieff besigelter mit minem insigel vnnd Růdolffes insigel von Roschach ze ainem sta^etten vrkunde. Dirre brieff ward gegeben ze Bichelsee nach der gepurt Cristi M°CC° vnnd im LXXXVIII ja^vre an dem trytten tag nach sant Gregoryen tag.

Source Fulltext: Chartularium Sangallense IV, Nr. 2193, S. 324.