In dem namun unsurs herrun kunde ich her Eburhart uon Bichulnse¹, der truhseze ze sante Gallun ist, allen den, die || disun brief lesunt alder horrunt lesun, das ich gegebun han ze choufunne das gůt ze Hutstal² vnde das holz unde || die ruti uffun Chizaberg³ vnde das holz uffun Rugebein⁴ den frowon uon Tennincon⁵ unde deme closter mit allem || rehte vnde swas zv^o Hutstal horut. Jch han dien frowon gelobut, das selbe gůt, das hie uor genemut ist, ze rihtunne von sante Gallun an ir scadun ze einum zins eigun inrunt einum iare, swenne der abbut uon sante Gallun vnde das capitul geeinbert werdun⁶. Das ich dis leistende^a) si an alle geuerde, das hie uorgescribun ist, dar umbe han ich inen ze burgun gegebun hern Eburhartun von Burgulon⁷ vnde hern Eburhartun^b) uon Eilgo⁸ vnde Rv^odolfun von Roscahc⁹ vnde Růdegen uon Werdegge¹⁰. Were abur das, das ich nut leisti, das hie vor gescribun ist vnde ich gelobun han, so sun sich die vier burgun vnde ich entwrtun ze Wintertur¹¹ alde ze Wile¹² in rehte gisulscaft vnde sun da ligun ane alle geuerde, vnz ich inen das gůt rihte. Were das, das dirre vier burgon eine sturbe, e ich inen das gůt uurrihte, so sun die drie sich entwrtun vnde ich in rehte gisulscaft inrunt einum manot, der su manot^c), vnz ich inen den vierden gebe. Das dis stete bulibe, das hiei^d) uor gescribun ist, des ist gezug her C. der luprester von Bichulnse, H. der Giel¹³, Eber. uon Sternege¹⁴, Ber. von Hugenberg¹⁵ vnde dirre brief busigultur mit minum insigul vnde der burgon insigul. Dirre brief wart gegebun ubur tusunt iar vnde zwei hundurt iar vnde LXXX iar vnde ahte iar nach deme geburtlichum tage unsurs herrun.

Source Fulltext: Chartularium Sangallense IV, Nr. 2203, S. 330-331.