In dem namen des vatters vnde des sunes vnde des hailigen gâistes amen. Ich V^olrich von Ramenswag¹ der alte tůn kunt allen den, die disen brîef lesent oder ho^erent || lesen, daz ich nach dem rate mines herren des abtes von Salmanswiller² mit miner svn Hainrich Walthers vnde Cůnrats³ willen miner sele dinch vnde ir hâile han || gesetzet vnde geordenot, als hîe nah gescriben ist. Vnde bi dem ersten wil ich, daz min herre der abt sich vnderwinde der zinse der vogtâige des gotshuse ze sant Gallen, || du mir stat von minem genaedigem herren saeligem⁴ dem kunig vmbe minen dienst⁵, vnde des houes ze Griezzerrun⁶ vnde der gůt, du ich dar zů benemmet han an ainem brîef vnder minem insigel⁷, nach minem tode zehant, vnde daz er sv enphelhe zwain alder drin miner manne, die^a) er darzů erwelle, die^a) die^a) zinse in nemen vnde du gůt besetzen vnde entsetzen vnde im aellu iâre antwrten die^a) zinse vnde daz gelt der gůte ze Costenz⁸ ald ze Salmanswiller, daz er da mit gelte vnde wider gebe allen den, den ich schaden han getan, nach hern Růdolfs von Guttingen⁹ vnde hern Hermans von Sulzberch¹⁰, Johannes von Anwile¹¹, Peters von Ramenswach¹² vnde V^olrichs von Sûls¹³ rate, die^a) dar vmbe gesworn hant, daz si mit truwen ervaren, wa ich schaden habe getan, daz man da gelt. Swenne aber vergolten wirt fur mich, so sol der vorgenemmet abt daz gelt von den phanden vnde von den gůten, du da zv^o benemmet sint, in nemen alse lange, daz er hundert marke silbers gewert werde, vnde wirt er der des ersten iares niht gewert, so sol er des andern iars niescen alse vil so im des ersten gebrast, vnde sol daz gut vnde dv phant wider an mine svn ald an mine erben vallen, vnde sol er mit den hundert marken ain aigen ko^vfen vnde von dem gelt des âigens aellu iar siner samenunge gen an dem hailigen abent ze osteron vnde an dem tage mines iargezites ainen dienst von Nekkerwîn¹⁴ vnde von gůten vischen durch miner sele willen. Ist aber, daz er des niht entůt, so sol er daz gelt, daz von den hundert marken chumt, des iârs, so es versumet wirt, der aebtissenne vnde der samenunge von Maggeno^vwe¹⁵ antwrten mit truwen. Geschiht o^vch, daz ain kunich du vorgenemtem^b) phant bi minem leben lo^eset, so binde ich mich an disem brief, dem abt ald sinem nahkomen des silbers, daz mir danne wirt von der lo^esunge, hundert marke ze gênne, daz er ain aigen ko^vfe, als in da vor gesprochen ist, siner samenunge. Das selbe sont o^vch mine svn tůn, der dv phant nach minem tode von inen lo^eset. Ich wil o^vch, daz mine sune die^a) vorgenanden oder ir erben, ob si ensint, nach minem tode in zwain iaren hundert marke silbers dem vorgenemten abt ald sim nahkomen jêtweders iars funfzech marke geben, ob es bi minem leben niht geschiht, daz er da mit ain aigen ko^vfe vnde von dem ainen alter stîfte vnde daz gelt nîesche îemer me, dar vmbe daz er ains priesters me habe îemerme, der da messe spreche durch miner vnde miner vorderon selen willen vnde miner sune. Waere o^vch, daz mir got dîe gnade gaebe, daz ich mich ze Salmanswiller zîehen wolti, so sol mir min herre der abt ain erber hûs da gen vnde sol daz gelt vnde die^a) zinse der vogtaige vnde der gůt în nemen, vnde sunt im die^a) das antwrten ze Salmanswiller, als da vor gesprochen ist, den ers enphilhet, daz er da von mich selbe zwelften¹⁶ vnz an minen tot begange vnde gebe, swes wir bedurfen. Wo^elt aber ich me danne das gelt vnde der zinse verzeren, so sol er mir niht gebunden sin me ze gebenne, noch den, die^a) bi mir sint. Wirt mir o^vch iht vber des geltes, da mit sol er gelten den, den ich schaden han getân, alse verre so daz râigot, vnde nach minem tode so sol er dv phant vnde daz gelt nîescen in allem dem reht, alse da vor gescriben ist. Tůt o^vch mir an den phanden oder an den gůten îeman chainen schaden, da sol der abt nach clagen als nach des closters âigenem gůt vnde dar umbe bannen. Vnde swaz er da verzert, das sol er von dem selben gůt nemen, vnde sun wir ich vnde mine sune im des helfen, alse vil so wir mugen. Wirt aber er clagent nach den hundert marken, die^a) er nîescen sol, daz sol er mit sinem schaden tůn. Ich binde o^vch mich, ob ich zv^oz im vâre, zwene aide drîge von minen mannen im ze gênne, den er du gůt vnde die^a) zinse enphelhe, alse da vor gesprochen ist, des selben sont o^vch mine sune gebunden sin nach minem tode, noch sont im mine svne oder mîn erben dekainen schaden tůn an den gůten oder an den phanden noch den, den ers enphilhet, ald dekain irrunge vnz daz er vergilt vnde abe genuscet, daz er da nîescen sol. Vnde daz disu dinch, dv da vor gescriben sint, staet beliben, so hant mir mine sune ze den hailigen gesworn, daz si daz lâisten alles daz, daz si da an triffet. Vnde zainer sicherhâit der selben dinge so hant si dem abt geben zehen burgen, die^a) hîe nach gescriben sint: hern Růdolfen von Guttingen, hern Růdolfen vnde hern Herman gebrůder von Sulzeberch¹⁷, hern Růdolfen von Stainach¹⁸, hern Burcart von Anewile¹⁹, hern Hannes von Scho^enenberch²⁰, hern Gerbolt von Mulhâin²¹, hern Hainrich den Lo^ewen von Zuckenriet²², hern Cůnrat von Haidelberch²³ vnde^c) . . . Vnde hant die^a) ze den hailigen gesworn, ob mine svn niht enlâistent, daz da vor gesprochen ist, daz si sich antwrten ze Costenz in die^a) stat von dem tage, daz si von dem abt gemanet werdent, in ainem mânode, vnde miner svn aine Hainrich Walther oder Cůnrat mit inen, vnde sunt da ze gisel ligen vf miner sun schaden vnde nîemer dannen komen, ê mine svn gelaistent dem abt, des si gesworn hant, oder mine erben, noch sol der abt, furst daz er die^a) burgen gemanet, dekainen gewalt han, inen vrist alde tage ze gênne, vnde wil ir chainer von redelicher vnde von rehter sache dannen varn, so er sich geantwrt, so sol er ainen andern an sin stat legen, der ze dem munde alse ture chome, als ob er selbe da laege. Stirbet o^vch der burgen châiner, so sont mine svn dem abt ainen andern gen an sine stat, vnde tůnt si des niht, so sol er der lebenden viêr manen, swele er wil, vnde sunt sich die^a) ze Costenz antwrten vnde niemer dannen komen, ê mine svn ainen andern an des stat gent, den er genimt. Woltin o^vch mine sune vnde die^a) burgen ir âide vergessen, daz si niht laisten woltint, des si gesworn hant, so sol der abt si mit geriht vnde mit baennen dar zv^o triben, daz si es lâistent. Swenne o^vch du gůt vnde du phant geuallent wider an mine svn oder an mine erben, so sont si gebunden sîn iemerme ze gelten allen den, den ich schaden han getan, den der abt niht vergolten habe. Vnde zainem vrkunde allr dirre dinge, so han ich disen brief gehâiscen besigelt mit mines herren des vorgenanten abts insigel vnde der burgen allerr, die^a) da vor genemmet sint, vnde mit dem minen vnde miner svn Hainrich Walthers vnde Cůnrats. Dis geschah ze Ramenswage, do von vnsers herren geburt waren tusent zwâihundert vnde ains vnde nunzech iare, in dem brâchot an sant Vitez tag, vnde waren da bi dise gezuge: her Růtlîeb der cappelan, her Hainrich von Bernegge²⁴, Růdolf der Gîele vnde V^olrich sin brůder²⁵, Willehalm von Scho^enenberch²⁶, Swigger von Lo^ewenberch²⁷, Johannes von Yberch²⁸, Johannes von Kessewille²⁹, Burcart von Anewille, brůder Eberhart von Stekboron³⁰, brůder Dietrich von Bermetingen³¹ munich von Salmanswiler vnde ander biderbe lute. Swaz aber ich V^olrich von Ramenswag da her ordenunge getân han durch miner sele willen oder gesetzet, daz widertůn ich an disem brîef vnde wil, daz disu ordenunge allaine staete belibe. Wir der abt von Salmanswiler vnde du samenunge veriehen, daz alles daz an disem brîef stat, ware ist, vnde binden vns ze lâistenne alles, daz vns an triffet, des hîe vor gescriben ist, mit truwen. Vnde zainem vrkunde so henken wir vnser insigel an disen brief. Wir Růdolf von Guttingen⁹, Růdolf vnde Herman von Sulzeberch, Růdolf von Stainach, Burcart von Anewille, Johannes von Scho^enenberch, Gerbolt von Mulhain, Hainrich der Lo^ewe von Zuckenrîet, Cv^onrat von Hâidelberch^d), . . . Hainrich Walther vnde Cůnrat von Ramenswag ritter, dîe hîe vor genemmet sint, veriehen, daz alles daz, daz an disem brîef stat, wâr ist, vnde binden vns daz ze laistenne ane alle gevaerde, vf den âit, den wir gesworn haben. Vnde zainem vrkunde so henken wir alle vnserv insigel an disen brîef.

Source Fulltext: Chartularium Sangallense IV, Nr. 2275, S. 381-383.