Allen, die disen brief sehent ald ho^erent lesen, kvnden wir vro Elizabeth greuenne von Raprechtswile¹, dc || wir von der gvlt schulden, die wir han von vnseren wegen vnd von vnser kinden² wegen, vnser mvli, dv || ze Geiletal³ an der Kemtv^on⁴ lit, dv vns eigenlich anho^ert, die wir geerbet han von vnserem brůder seli||gen graven Růdolf von Raprechtswile⁵, verko^vft han mit grvnde vnd mit wasser, mit achern vnd mit wisen, mit holz vnd mit velde vnd mit allem dem rechte vnd mit aller der ehaftigi, so ze der mvli ho^ert, Chv^onrat dem Scho^enower von Mosburch⁶ vnd Chv^onrates des Zwigers kinden von Ilnowe⁷ fvr ein lidig eigen vmb achzehen march lo^etiges silbers Zurich gewicht, vnd sien der gewert alleklich vnd veriehen des an disem brieue. Vnd hein wir vnd vnser kint inen die mvli vnd swc darzv^o ho^ert vf gegeben an ir hant fvr lidig eigen vnd han diz getan mit des edelen herren hant vnd willen hern Růdolfs vrien von Warthe⁸ ritters, der mit rechter vrteilt vns^a) ze voget wart gegeben ze verko^vffenne die vorgenant mvli vnd ze volfv^erren den ko^vf, dc wir mit dem silber ein teil vnser nôt, die wir han von gvlte, mo^echten vberwinden. Wir loben o^vch vnd binden vns vnd vnser erben, dc wir Chv^onrates des Scho^enowers von Mosburch vnd Chv^onrates kinden des Zwigers von Ilnowe vnd ir erben vnd ir nachkomen wer sien der mvli vnd swc ze der mvli ho^ert fvr lidig eigen an allen gerichten geistlichen vnd weltlichen, swa ald swenne siv es bedvrfent. Vnd ze einem offennem vrkvnt alles, so da vorgeschriben stat, geben wir inen vnd ir nachkomen disen brief mit vnserem vnd hern Růdolfs vrien von Warte ritters des vorgenanden vnsers vogetes ingesigeln besigelt offenliche. Diz geschach Zurich an der offennen Strasse vor dem kloster, dc da heisset O^etenbach⁹, an sant Nicolaus abent, do von gottes geburt waren zwelfhundert jar in dem dritten vnd nvnzegostem jare. Vnd wc da ze gegen graue Růdolf von Habsburch¹⁰, her Ru^edege ritter von Werdegge¹¹, Jacob von Slatte¹², Johans hern Heinrichs ritters von Kloten¹³ svn, her Hartman vnd her Chv^onrat Saler, Heinr. Kv^ogat, Růdolf in dem Kelre, Hug von Meilingen¹⁴ vnd ander genv^og^b) gezugen, die hiervmbe dar gebetten vnd komen waren. Ich her Rudolf vrie von Warthe ritter, wan ich mit^c) rechter vrteilt miner vrowen vron Elizabethen greuennen von Raprechtswile ze voget bin gegeben vnd von ir genomen ze verko^vffen vnd ze volfu^erren die vorgeschriben mvli vnd dc darzv^o ho^ert, vergich vnd offenen, dc min^d) vro^vwe dv vorgenande die mvli vnd swc dar zv^o ho^ert verko^vft vnd vfgegeben het mit miner hant vnd willen, als da vorgeschriben stat, vnd durch ir bette henk ich min ingesigel an disen brief ze einem offennem vrkvnt alles, so da vorgeschriben stat, vnd han diz getan vnd ist geschehen an dem tage vnd der stat vnd in der jarzal, als da vorgeschriben stat.

Source Fulltext: Chartularium Sangallense IV, Nr. 2324, S. 420-421.