Allen, die disen brief sehent ald ho^erent lesen nu ald har nach, kunden wir Elsabeta du grevin || von Raprechtswiler graven Ludwiges seligen wirtinne von Hônberg¹, dc Růdolf von Hofstetten² || amman von Walastade³ sin gůt, dc da heizet du Owa⁴, bi Wrmspach⁵, dar an stoset der vrowon gůt || von Wrmspach⁶, dc da heiset Schorenbu^el⁷, sunnenhalb, vnd anderthalb des vorgenanden Růdolfes hof abendes halb⁸, das er von vns vnd von vnseren vorderen ze rechtem lene hatte, mit vnserm vnt vnser kinde vnd vnsers vogtz graven Hugs von Werdenberg⁹ willen vnt gunst dien geistlichen vrowon der ebtischinnun vnt dem conuent von Wrmspach des ordines von Citels in Kostencer bistom an ir vnd an des selben gotzhus stat von Wrmspach mit allem rechte, mit wasser, mit holze, mit velde, mit wisen, mit achern, mit wnne, mit weide, mit gethwinge, mit banne, mit aller ehaftigi vnd mit allem dem rechte, so dar zů ho^eret, rechte vnd redliche mit aller der gwarsami vnd mit aller der ortvrumunge, so nach rechte ald nach gewonheit noturfdig ist an susgetanen ko^efen, vrko^vft het vmbe zwo vnd drîssig march lo^etigiz silbers Zuricher gewicht, vnd dc er dc selbe silber emphangen het alleklich vnd im selbun angeleit het nuzberliche vnd dc die vorgenanden vrowe an ir vnd an des gotzhus stat von Wrmspach dc selbe gůt von vnser hant nach des selben vfgebunge Růdolfes des ammans emphangen hant und in ir gewalt^a) gezogen hant nach rechte vnd nach des landes sitte vnde gewonheit eigenlich, vrilich vnd evklich ze bisizen iemer me. O^vch het der selbe amman gelobt dien vor genanden vrowon vur^b) sich vnd vur^b) alle sin nachomen, das er des selben gůtz wer sol sin an geistlichem vnd an weltlichem gerichte vnd an allen tegdinge, swa su sin budurfen. Vnt dc dis alles war si vnd stête vnd veste belibe, so heinken wir Elsabeta du vorgenande greuin, wir grave Hug von Werdenberg vnt^c) ich der vorgenande amman vnser ingesigel an disen brief ze einem ewigen vrkunde. Dis beschach, do von gotz geburt^d) waren zwelfhundert vnd nunzeg vnd vier iar vnd dar nach in dem vierden iare^e) ze sant Jacobs tult, da ze gegeni ware, der namen hie nach geschoben sint: her Heinrich der Marschal von Raprechtswile, her Chůrat der Truchseze¹⁰, her Jacob der Schultheis von Raprechtswile¹¹, her Peter von Ranbach¹², her V^olrich von Ranbach, her Růdolf von Hasle¹³ vnt her Johans Gamlunstein vnd ander biderbe lute genůge. Dis wart vol fu^eret an sant Michels tage ze Zurich in der stat, des selben iars, do indictio was du actoda.

Source Fulltext: Chartularium Sangallense IV, Nr. 2358, S. 444-445.