Allen den, die disen brief an sehent oder ho^erent lesen, kvnde ich Willehalm ain ritter von Staina¹, || daz der maister vnde die phleger des spitals des hailigen gaistis ze Kostenze² ko^vfton vmbe Johannesen den || Hv^ober minen man, der min aigen ist, ain gv^oteli, daz lît ze Pettenanch³ in Ho^eri⁴ bi des spitals gv^ot, vmbe zwai || phvnt vnde sehs schillinge Kostinzer phenninge, vnde giltet daz gv^oteli zwene mvtte habirn vnde ainen halben mvtte kernin zwai iâr, vnde daz dritte iâr giltet ez nivt, vnde ist reht aigen, dierre ko^vf geschach mit minem willen vnde mit miner hant rehte vnde redelichen ane alle gevaerde, vnde gap inens vf an der dvrfigen stat mit allem rehte vnde mit Johannese minem man, vnde daz ez o^vch staete belibe dem vorgenanden spitale vnde den dvrftigen von mir dem vor genanden Willehalme von Staina vnde minem man Johannesen vnde von allen vnseren erben, dar vmbe hiez ich in disen brief schriben vnde henche min insigel dar an ze ainem vrkvnde vnde vestenvnge ainer ganzen warhait. Diz geschach vnde wart dierre brief geben ze Kostinze an dem ersten dvnrestage in dem maien, do man zalte von gottes gebvrte zwelf hvndirt jâre vnde nivnzic vnde in dem vierden jâre.

Source Fulltext: Chartularium Sangallense IV, Nr. 2338, S. 430.