Wir graue R. von Habspurg vnd herre ze Rapreswile vnd wir Elizabet grevin von Habspurg vnd fro^vwa ze Rapreswile¹ kvnden allen den, de disen bref sehent || ald horrent lesen, das Peter von Ranbach² vnser leiber^a) burger von Rapreswile sin kamer len in dem hove ze Obrendvnrten³ ein malter habren geiz ierlichs, das von vns der || herschaft von Rapreswile sin rect kamer len was, verko^vfet hat rect vnd redlich den erberen heren . . dem abte vnd dem gozhûs ze Rvti⁴ vmb sech^a) phvnt phenningen || Zvrier^a)5, der sv in gewert hant, vnd hat das verko^vfet in allem dem recte gegen nvzze, als o^vch ers hatte vnd nôs vnd von alter dar bracht wart. Vnd wand Peter dasselbe len âne vnser der herschaft von Rapreswile hant, gvnst vnd willen nvt mocte entfromden noch verko^vfen, so bat er vns flelich, das wir im das gondin ze verko^vfenne dur sin nôtdurft vnd es von im vfnemin vnd das selbe len gebin ze rectem eigen den vorgenanden heren von Rvti vnd o^vch das mit vnseren breven vndingesiglen bestetin. Das selbe len namen wir ze siner bette vf vnd gaben das vnd gebens o^vch an disem breve, vnd swas rectvnge wir dar an hatten ald mocten gen, frilich vnd lideklich dur vnsers heiles willen dem . . abte vnd dem vorgenandem gozhûse ze Rvti ze rectem frien vnd lidigem eigen, den wir dv herschaft von Rapreswile o^vch ze rectem eigen friem vnd lidigem geben hein vnd mit vnseren breven bestet⁶, den hof ze Obrendvnrten mit allem recte, so dar zo^v horret, dar in dis selbv kamer len horret. Vnd veriehen dis alles an disem breve vnd das es beschehen ist mit vnser hant willen vnd gvnst, vnd wer, das sv dar an eiman^a) wolte beswerren an geistlihem ald an weltlihem gericte, so sol sv Peter verstân mit siner kost vnd erbeit, swa vnd swenne das beschicht vnd sûs bedurfen, er entzieht sich o^vch aller ansprahe, de er eimer^a) mocte gewnnen^a) vmb dis go^vt an geriete ald âne geriete. Vnd das dis bi vns vnd Peter stet belibe mit go^vter trvwe an allen vâr, so geben wir ze Peters bette den vorgenanden heren disen bref besigelt offenlich mit vnser beider ingesigel vnd besteten, swas he geschriben stat. Dis beschac ze Rapreswile, do ze gegen waren dise gezuge: der kilkenherro von Jonen⁷, H. ab dem Turne⁸, R. von Kloten⁹, H. ab Ebnode¹⁰, Hvg Brvno, Hvg Manesse, H. Boni, H. Primli, R. von Gro^vnowa¹¹ vnd H. der Armo, do von gottes geburte waren zwelfhvndert acht vnd nvnzig iar, an dem zîstage ze mittem o^vgsten.

Source Fulltext: Chartularium Sangallense IV, Nr. 2454, S. 520.