Dilecto filio Johanni Laebi rectori parrochialis ecclesie in Jonswil¹ Constanciensis diocesis salutem etc. Vite ac morum honestas aliaque probitatis et virtutum merita, super quibus apud nos fidedignorum commendaris testimonio, nos inducunt, ut tibi reddamur ad graciam liberales. Volentes itaque tibi in presbiteratus ordine constituto premissorum meritorum tuorum intuitu graciam facere specialem, beneficium ecclesiasticum sine cura, etiam si in ecclesia cathedrali existat, dummodo canonicatus et prebenda ipsius ecclesie non fuerit et canonicis eiusdem ecclesie non consueverit assignari, cuius fructus redditus et proventus decem et octo marcharum argenti secundum taxacionem decime valorem annuum non excedant, ad collacionem provisionem presentationem seu quamvis aliam disposicionem venerabilis fratris nostri. . episcopi Constanciensis et dilectorum filiorum . . prepositi. . decani et capituli ecclesie Constanciensis communiter vel divisim pertinens, siquod vacat ad presens vel cum vacaverit, quod tu per te vel procuratorem tuum ad hoc legitime constitutum infra unius mensis spacium, postquam tibi vel eidem procuratori vacacio illius innotuerit, duxeris acceptandum, conferendum tibi post acceptacionem huiusmodi cum omnibus iuribus et pertinenciis suis donacioni apostolice reservavimus, districtius inhibentes eisdem episcopo preposito decano et capitulo, ne de huiusmodi beneficio interim etiam ante acceptacionem eandem nisi postquam eis constiterit, quod tu vel procurator predictus illud nolueritis acceptare, disponere quoquomodo presumant, ac decernentes exnunc irritum et inane, si secus super hiis a quoquam quavis auctoritate scienter vel ignoranter contigerit acceptari, non obstantibus quibuscumque statutis et consuetudinibus ipsius cathedralis vel alterius ecclesie, in qua huiusmodi beneficium forsan fuerit contrariis iuramento confirmatione apostolica vel quacumque firmitate alia roboratis, aut si aliqui super provisionibus sibi faciendis de huiusmodi vel aliis beneficiis ecclesiasticis in illis partibus speciales vel generales apostolice sedis vel legatorum eius litteras impetrarint, etiam si per eas ad inhibitionem cessionem et decretum vel alias quomodolibet sit processum, quibus omnibus preterquam auctoritate nostra huiusmodi beneficia expectantibus te in assecutione dicti beneficii volumus anteferri, sed nulluni per hoc eis quoad assecutionem beneficiorum aliorum preiudicium generari, seu si eisdem episcopo preposito decano et capitulo vel quibusvis aliis communiter vel divisim ab eadem sit sede indultum, quod ad receptionem vel provisionem alicuius minime teneantur et ad id compelli non possint, postquam de huiusmodi vel aliis beneficiis ecclesiasticis ad eorum collationem provisionem presentationem seu quamvis aliam dispositionem communiter vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mentionem et qualibet alia dicte sedis indulgentia generali vel speciali, cuiuscumque tenoris existat, per quam presentibus non expressam vel totaliter non insertam effectus huiusmodi nostre gracie impedire valeat quomodolibet vel differri, et de qua cuiusque toto tenore huiusmodi sit in nostris litteris mencio specialis, aut si presens non fueris ad prestandum de observandis statutis et consuetudinibus ipsius ecclesie solitum iuramentum, dummodo in absentia tua per procuratorem ydoneum et cum ad ecclesiam ipsam accesseris corporaliter illud prestes, seu si hodie pro alio vel aliis super equali vel equalibus gracia vel graciis de simili beneficio ad collationem provisionem presentationem seu quamvis aliam dispositionem . . episcopi prepositi decani et capituli predictorum communiter vel divisim pertinente litteras nostras duxerimus concedendas, nos enim tam illas quam presentes effectum sortiri volumus quacumque constitutione apostolica contraria non obstante, aut quod parrochialem ecclesiam in Jonswil Constanciensis diocesis nosceris obtinere. Nulli ergo etc. nostre reservationis inhibitionis constitutionis et voluntatis infringere etc. Dat. Auinione kl. aprilis anno tercio. In eodem modo dilectis filiis . . abbati monasterii Fauariensis² et.. preposito Werdensi³ Curiensis et Constanciensis dioc(eseum) ac . . decano sancti Agricoli Auinionensis⁴ ecclesiarum salutem etc. Vite ac morum etc. usque obtinere. Quocirca mandamus, quatenus vos vel duo aut unus vestrum per vos vel alium seu alios huiusmodi beneficium per nos ut premittitur reservatum, si tempore huiusmodi nostre reservacionis vacabat vel postea vacavit aut cum illud vacare contigerit post acceptationem huiusmodi, cum omnibus iuribus et pertinenciis suis eidem Johanni auctoritate predicta conferre et assignare curetis, inducentes eum vel procuratorem suum eius nomine in corporalem possessionem beneficii ac iurium et pertinenciarum predictorum et defendentes inductum ac facientes eum vel dictum procuratorem pro eo ad huiusmodi beneficium, ut est moris, admitti, sibique de ipsius beneficii fructibus redditibus proventibus iuribus et obventionibus universis integre responderi, non obstantibus omnibus supradictis seu si eisdem episcopo preposito decano et capitulo vel quibusvis aliis communiter vel divisim a prefata sede indultum existat, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mentionem, contradictores auctoritate nostra etc. Dat. ut supra.

Source Fulltext: Chartularium Sangallense IX, Nr. 5347, S. 14-15.