Allen den, die disen brief an sehent lesent oder ho^erent lesen, kúnd ich Elsbetha Horchentalin V^olrich Horchentals von sant Gallen elichi frôw || vnd wilent Růdolfs des Schenken sailigen von Landegg¹ elichi tochter vnd vergich des offenlich mit disem brieue, das ich mit wolbedâhtem můt || von miner redlichen nôt vnd sach wegen verkoft han fúr mich vnd alle min erben vnd nahkomen den erbern kneht Burkart den Múller von || Zůzwille² den schůhmacher, den man spricht Cůntz Múller, mit lib vnd mit gůt vnd mit allen rehten, der min lehen was von dem gotzhus ze sant Gallen, vnd han ze koffenn geben redlich vnd reht dem erwirdigen fúrsten minem gna^edigen herren abt Geo^eriien des egeschriben gotzhus ze sant Gallen³ vnd allen sinen nâhkômen vnd och dem selben sinem gotzhus vmb ain pfunt pfenning alles gůter vnd gena^emer Costentzer múns, der selben pfenning ich aller gar vnd gentzlich von im bin gewert vnd bezalt an denan stetten, da ich minem nutz vnd frôm mit geschaffot han. Ich han och mit gůter beschaidenhait vnd vorbetrachtûnge wilklich vnd frilich den vorbenemten Burkart Múller mit lib vnd mit gůt vnd mit allen rehten letklich vnd luterlich vfgeben vnd geuertegot an des vorgedahten abt Geo^eriien hand, als reht sitt vnd gewônlich was, hin zů siner siner nahkômen vnd zů sins vorgeschriben gotzhus handen vnd wegen ân geuerd. Ich die egen(an)t Elsbetha Horchentalin han och mit gůter gewisseni vnd mit gůten willen gelobt fúr mich vnd fúr alle min erben vnd nahkomen, des vorbenemten abt Georiien siner nahkomen vnd och des egedahten sins gotzhus des vorbenemten Burkartz Múllers vnd och des kofs reht wer ze sinne gen mainglichem vnd och an allen stetten vff gaistlichem vnd vff weltlichem gericht, wenn wa vnd als dik sin der selb abt Geo^eri sin nahkomen vnd och das vorgeschriben sin gotzhus vnd der vorbenemt Burkart Múller des bedurfent vnd notdúrftig sint ald darumb angesprochen oder vfgetriben werdent, das ich vnd min erben sú darumb verstan vnd versprechen sont ân fúrzug vnd ân allen iren schaden. Sunderlich han ich mich och verzigen gentzlich vnd gar gen dem vorbenemten abt Geo^eriien gen sinen nahkomen vnd gen dem vorgeschriben sinem gotzhus vnd och gen dem egen(an)ten Burkart Múller aller aigenschaft aller lehenschaft aller manschaft aller kuntschaft aller zúgnust aller gewer lút vnd brieue aller vordrung vnd ansprach vnd och alles des rehten, so ich oder min erben vnd nahkomen an vnd zů dem vorbenemten Burkart Múller zů sinem libe vnd zů sinem gůte ie gehebt han ald noch hienach iemer gehaben gewinnen oder erwerben mo^ehtint in dehain wîs von reht ald von gewonhait, vnd verzihe mich vnd min erben vnd nahkomen och des alles, so vorgeschriben stat, letklich vnd alklichen mit disem brieue ân geuerd. Och han ich wilklich gelobt mit gůten trúwen fúr mich vnd alle min erben vnd nahkomen, das ich noch ainkain min erben noch nahkomen noch nieman andrer von v´nsren wegen noch an v´nser stat den vorbenemten abt Georiien noch sin nahkomen noch das vorgedaht sin gotzhus von des vorgen(an)ten Burkartz Múllers sins libs noch von sins gůtes^a) wegen noch och den selben Burkart Múller sin lib noch sin gůt niemer me súllent noch wellint ansprechen vftriben bekúmberren bekrenken noch in ainkain wis noch weg beswa^erren weder mit gaistlichem noch mit weltlichem gericht nach ân reht noch mit ainkainen andren sachen. Vnd ist dis alles reht vnd redlich beschehen volfu^ert vnd volbrâht mit allen worten werken geba^erden vnd geta^eten vnd mit aller sicherhait vnd versorgnust, so darzů gehortent nútz gůt vnd notdúrftig waren von reht vnd von gewônhait vnd als es kraft vnd maht hat vnd haben sol vnd mag nv^ vnd hernach, Vnd des vnd hierúber ze ainer warhait aller vorgeschribener ding vnd gedingde han ich Elsbetha Horchentalin da vorgen(an)t min insigel fúr mich vnd fúr alle min erben offenlich gehenkt an disen brieue. Der geben ist ze Wil⁴ in der stat an dem na^ehsten zinstag vor v´nsers herren vffart tag, do man zalt von gottes gebúrt drútzehenhundert jar, darnach in dem drú vnd sibentzigesten jar.

Source Fulltext: Chartularium Sangallense IX, Nr. 5358, S. 34-35.