Wir^a) Karl von gots gnaden Romischer keiser zu allen czeiten merer des reichs vnd kunig zu Beheim bekennen vnd tûn kunt offenlich || mit disem briefe allen den, die in sehen odir horent lezen, das wir mit rechter wissen vnd keiserlicher mechte vollenkomenheit den || burgermeistern den reten vnd den burgern gemeynlich der stat zu sand Gallen, die nu sein odir zu czeiten werden, vnsern || vnd des reichs lieben getruwen, die gnade getan haben vnd tu^en in die mit crafft dicz briefs in aller der mazze, als hernach geschriben stet. Des ersten das nyemande, wer der wer^e, sie odir dheyne ire burgere wedir vmb ire leibe noch vmb ire gute für dheyne gerichte laden sulle odir moge, wann^e alleyne fur iren statamman, do sol man das recht von in nemen, es were denne, das dem clager doselbst recht vorsaget wurde. Were abir, das yemande sie dorubir lu^ede fur dheyn ander gerichte, was denne doselbist vrteyl vbir sie erteilet wurden, die sullen keyne crafft noch macht haben. Were ouch, das yn eyn apt odir eyn pfleger des gotshuzes zu sand Gallen eynen amman nicht geben wolde, als von aldir gewonlich gewezen ist, wenn^e sie den an yn vorderten, das denn^e noch derselben vorderunge vnser vnd des reichs vogt, der zu den czeiten do wirdet von vnsern vnd des reichs wegen, in eynen amman moge geben, des sie denn^e begernde werden, der yn richte als lange vncz das yn eyn apt odir eyn pfleger des egenanten gotshuzes eynen andern gebe, der yn richtet, als das von aldir gewonlich gewezen ist, doch dem apte dem pfleger vnd dem gothuze an allen iren gutern czinzen vnd nuczen vnschedlich. Was ouch sie burgere empfangen haben odir noch empfahen, die jare vnd tag bey in an ansprache gesessen haben odir siezen, welches herren lute die weren, die mogen sie schirmen als andre ire ingesessen burgere, es were denn^e, das dieselben ire herren ynnewendig des landes nicht weren. Ouch ist vnser meynung vnd wellen sundirlich, das nyemande, wer der were, dieselben burgere zu sand Gallen gemeynlich odir sundirlich fur eynen apt odir das gotshuze zu sand Gallen odir fur ire vogte, die yn das reiche gibt, als vorgeschriben stet, angriffen odir bekumberen moge noch sulle in dheynenweiz. Vnd dorumb gebiten wir allen fursten, geystlichen vnd weltlichen, grafen vreyen dynstluten vogten rittern knechten richtern vnd gemeynschefften der stete vnd allen andern vnsern vnd des reichs getruwen vndirtanen, in welchem wezen odir wirden die weren, ernstlich vnd vestielich bey vnsern vnd des reichs hulden, das sie alle odir ir dheyner die egenanten burgere vnd stat zu sand Gallen an den obgeschriben vnsern gnaden alliclich odir bey teilen nicht hindern noch irren sullen noch gestaten, das sie doran von yemanden gehindert werden in dheynenweiz, wann wer do wider tete, der sol in vnser vnd des reichs vngenad swerlich veruallen sein vnd in eyn pene fomfczig marke lotiges goldes, die halb in vnser keiserliche camer vnd das ander halbeteil den egenanten burgern zu sand Gallen genczlichen vnd ungeleslichen genauen sullen. Mit vrkund diez briefs vorsigelt mit vnserr keiserlichen maiestat insigle. Geben zu Prage noch Crists geburde dreyczenhundirt jar, dornach in dem drey vnd sybenezigstem jare, am sunnabent vor sand Merteins tag, vnsir reiche in dem acht vnd czwenzigstem vnd des keisertums in dem newnezenden jare.

Source Fulltext: Chartularium Sangallense IX, Nr. 5384, S. 59-60.