Allen den, die disen brief ansehent oder ho^erent lesen, kúnde ich brůder Bilgri von Kloten¹ couent brůder ze Rúti² vnd ich fro Margaret || Bertschingerin sin eliche tochter vnd veriehen offenlich an disem brief von dez briefs wegen, den Fritschi von Kloten burger || Zúriche inne hatt, der da wiset vnd seit von dez hofs wegen ze Spreitenbach³, als der selb Fritschi von Kloten den selben || brief geben vnd in geantwúrt hett Bilgrin dem Russinger burger ze Rapreswil⁴, daz v´nser gůter wille was vnd noch ist, vnd da von so loben wir mit gůten trúwen fúr v´ns vnd fúr alle v´nser erben, Fritschin von Kloten noch sin erben noch nieman von ir wegen von des briefs wegen niemer mer an ze sprechenne noch in deheine wise ze bekúmbern weder mit geistlichen noch mit weltlichen gerichten noch mit deheinen sachen worten noch werchen. Vnd dez ze warem vrkúnde vnd sicherheit so han ich brůder Bilgri von Kloten min eigen insigel offenlich gehenkt an disen brief. Vnd won ich fro Margarethe Bertschingerin nit insigels han, so han ich erbetten Johansen von Langenhart⁵ vogt ze Rapreswil, daz er sin insigel fúr mich gehenkt hat an disen brief, vnder dz selb insigel ich mich willeklich binde in dirre sach. Dez ich Johans von Langenhart vergich, das ich min insigel durch der egenanten fro Margarethen Bertschingerinen bette wegen gehenkt han an disen brief, mir vnd minen erben vnschedlich. Dirre brief ist geben an dem nechsten zistag nach sant Andrêes^a) tag in dem jar, do man zalt von gottez gebúrt drúzehenhundert vnd sibentzigjar vnd dar nach in dem vierden jare.

Source Fulltext: Chartularium Sangallense IX, Nr. 5427, S. 104.