Allen den, die disen brief ansehent oder ho^erent lesen, kúnde ich Johans von Langenhart vogte¹ vnd wir der || rate der statt ze Rapreswil² vnd veriehen offenlich an disem brief, daz fúr v´ns kame in offen ge||richte Andres Kútz wilunt Heinr. seligen Kútzen elicher svn vnd Jacob Sarwúrkel burger ze Rapreswile, || vnd offnot da Andres Kútz, daz er Jacob Sarwúrkel recht vnd redlich ze ko^vffenne geben hetti den sechsten teil dez vachs in den Húrden³ bi der stat ze Rapreswil, das man nemt Sto^eris vach vnd sto^esset einhalbe an dez spitals vache vnd anderthalbe an Horne vache, den driten teile dez vachs, dz o^vch gelegen ist in den egenanten Húrden, das man nemt Herweg vnd sto^vsset einhalb an der Flu^e4 lúten vache vnd andrunt, da man vert durch die sv´n vf, vnd den teil dez vachs, daz o^vch gelegen ist in den obgenanten Húrden, daz man nemt Vro^esch vache, mit allen rechten nv´tzen gewonheit vnd zů geho^erde, die zů den vachen allen ald ieklichem besvnder zů geho^erd. Vnd dar vmb so het der selb Andrês Kútz von Jacob Sarwúrkel empfangen in eins rechten ko^vfs wise an zwei sechtzig pfvnt pfenning Zúricher mv´ntz genger vnd genemer, der er gantzliche von im gewert were vnd in sinen gůten nvtz bewendet het nach siner vergicht. Vnd entzehe sich o^vch der selb Andres Kútz fúr sich vnd sin erben nv vnd hie nach vor v´ns an offem gericht, als gericht frag vnd vrteil gab, aller eigenschaft rechtez vordrung vnd o^vch ansprache, so er an den vorgeschribnen vachen gehebt het ald hie nach iemer mere gewúnnen mo^echte, deheins wegs an des obgenanten Jacobs Sarwúrkels hand. O^vch lo^vbte der selb Andrez Kútz fúr sich vnd alle sin erben ane geuerde, der vorgeschribnen vache wer ze sinne nache recht fúr rechte ledig eigen ane geuerde an allen den stetten, da sin der obgenant Jacobe Sarwúrkel oder sin erben notdurftig sint vnd dez bedurfent an geistlichen vnd an weltlichen gerichten vnd an allen stetten ane geuerde. Vnd won dis alles vor v´ns an offem gericht beschehen vnd vollfu^ert ist, da von so haben wir die obgenanten der vogt vnd der ratt ze Rapreswil der selben v´nser stat insigel nach rechter vrteil vnde durch beider teile bett wegen offenlich gehenkt an disen brief. Der geben ist in dem jare, do man zalte von gottez gebúrte drútzehenhvndert vnd sibentzig jar vnd dar nach in dem fúnften jar, an dem nechsten mentag nach der liecht misse. Hie bi warent dez ratez V^olrich Frijo, Heinrich Kaltprv´ner vnd Hans Keyser.

Source Fulltext: Chartularium Sangallense IX, Nr. 5439, S. 114.