Wir Lúpolt von gots gnaden hertzog ze O^ester(rich) ze Steyr ze Ke^arnden vnd ze Krain graf ze Tyrol¹ etc. veriehen vnd tůn || kunt, als vnser getriwn lieben Heinr. Ge^azzler vnser kamermeister vogt ze Gru^eningen² vnd Langenhart vogt ze Rapres||wile³ von derselben se^atz wegen, die si von vns innhabent, vmb dis nachgeschriben stuk mit einander sto^ezzig waren, || habent vnser herren vnd re^at darumb mit dem rechten erfunden vnd erteilt, als her nach geschriben stet. Des ersten vmb die lút genant die Bru^echen, seynd die vor an gen Gru^eningen gehortten vnd sich dahin ergeben hatten, mochten noch solten si sich an vnsern willen vnd vrloub vzzer derselben vogtey gen Rapreswil⁴ noch anderswohin nicht ergeben, dauon sullen si noch als von erst gen Gru^eningen geho^ern vnd dahin dienen vnd warten an all widerred. Darnach vmb den man genant der Aynsidler habent die vorgenanten vnser herren vnd re^at erfunden vnd erteilt, seynd die herschaft von Gru^eningen solich recht hat, als mit gůten briefen vnd vrku^enden bewiset ist, was lút vf den ho^efen ze Mu^enchaltorf⁵ ze Dunrton⁶ vnd vf der fryen dingstatt ze Wynczikon⁷ geborn werden, ez sien man oder wib, daz die ein vogt ze Gru^eningen erben vnd vallen su^ell, wa er die begriffet, vnd seynd der obgenant Aynsidler ein hofman dahin gewesen ist, sull in der obgenant vogt von Gru^eningen pillich erben vnd vallen vnd nicht ein vogt von Rapreswil. Dieselb vrteil ist ze gelicher wis genauen vmb den man genant der Herr am Boll, wan der ouch ein hofman dahin gewesen ist, dauon sol in ouch der vogt von Gru^eningen erben vnd vallen. Dann vmb Heinrichen den Hodel, der ein panchart was vnd der ze Rapreswil gestorben ist, habent die vorgenanten vnser herren vnd re^at gesprochen vnd erteilt, was er siner elichen housfrown vor dem gericht ze Rapreswil gemacht vnd gefu^egt hat, daz sull ir pillich beliben, was er aber darüber gelazzen hat, dartzů hat der recht, der in derselben grafschaft vogt vnd phleger ist, darinn der obgenant panchart gesezzen vnd gestorben ist. Darnach vmb den Mu^ench, der in dem ampt vnd gericht ze Gru^eningen tod ist, habent die vorgenanten vnser herren vnd re^at erkant, seynd der in dem gericht ze Gru^eningen gesezzen vnd verscheiden ist, sin hab geho^er in dieselb grafschaft, vnd der vogt von Gru^eningen sull in pillich erben. Darnach vmb die lút von Gru^eningen, die von der obgenanten sto^ezz vnd vflu^vff wegen verbunden vnd beschadigt sind, habent die vorgenanten vnser herren vnd re^at erfunden vnd gesprochen, daz man die ergetzen vnd vnuerczogenlich ir sche^aden ablegen sol. Dauon wellen wir vnd gebieten ouch ernstlich beiden teilen, daz si das also stet haben vnd volfu^eren, als die obgenanten vnser herren vnd re^at erfunden vnd gesprochen habent vnd als hie vor an disem brief geschriben stet. Mit vrkund ditz briefs. Geben ze Rynuelden⁸ an donrstag vor dem zwelften tag ze wichnachten nach Krists geburt drútzehen hundert iar, darnach in dem fu^emf vnd sibentzigisten iare.

Source Fulltext: Chartularium Sangallense IX, Nr. 5432, S. 109-110.