Allen^a) den, die disen brief an sehent oder ho^erent lesen, kúnden wir V^olrich von Wilberg¹ chorherre ze Lindo^vw² vnd Joh. von Wilberg³ || burger ze Rapreswile⁴ gebrůder vnd veriehen offenlich mit disem brief fúr v´ns vnd alle v´nser erben, daz wir baid gemainlich || vnd vnbetwungenlich mit wolbedahtem můt vnd vorbetrahtung durch got vnd durch v´nser sel hail willen gemachet || vnd geordnet habin denen erwirdigen gaistlichen frowen der a^ebtissenn vnd dem conuent gemainlich dez gotzhûs ze Wurmspach⁵ vnd allen iren nâchkomen ainen halben mútt kernen vnd zehen schilling phenning Zúricher múns vff vnser aygen gůt, daz gelegen ist ze Nidren Bollingen⁶, daz ietz Bertholt Schnetzer buwet, daz v´ns jerlich gilt ain mútt kernen ain malter haber vnd ain schwin oder aber zwai phund phenning gewonlicher Zúricher múns fúr daz schwin, vnd sol dis vorgenant sel gera^et alwent beriht werden ze sant Martins tag vor allen zinsen. Wa^er aber, daz daz vorgenant gůt den halben mútt kernen zins nit getragen mo^eht, so sol man inen denn fúr den halben mútt kernen geben so vil phenning, alz er denn gilt ze sant Martins tag in dem selben jar. Wir habent o^vch geordnet den vorgenanten fro^vwen vnd allen ir nâchkomen ieglicher frôwen ain mâss wins jerlich durch min dez vorgenanten Joh. von Wilberg vnd fro Vrsullen von Rambach miner elichen husfrowen seligen sei willen, alz manig fro^vw denn ist in dem vorgenanten conuent, ab dem wingarten vnd v´nserm rebwachs, so wir in dem vorgenanten dorf ze Nidran Bollingen habin, vnd sol man den vorgenanten win taillen jerlich vff den tag, alz der vorgenanten miner husfrowen seligen jarzit vnd min behúgt begangen wirt, ieglicher frowen^b) ain mâss wins, alz vorbeschaiden ist, ân allen fúrzúg. Wa^er aber, daz dehains jars alz vil wins nút wrdi, daz man den vorgenanten fro^vwen ieglicher ain mâss wins nit geben mo^eht, so sol man es vff dz nehst jar, waz vormâls versessen ist, dez nehsten jares erfúllen mit dem veruallen jarzit, dz denn veruallen ist. Wa ôch dz vorgenant selgera^et kaines jares erfúlt vnd vsgeriht nit wrdi vnd och die zins, so mugent si die vorgenanten gu^eter ân griffen vnd verkoffen vmb so vil, alz inen denn ze mâl vsgelegen ist, in welem jâr daz beschiht, alz ir aigen gůt, vnd sol v´ns vnd v´nser erben vff den vorgenanten gu^eter da vor nút schirmen weder gaistlich noch weltlich geriht noch kainer laig sach, die nu ze mal noch hie nach erdaht ist oder wirt. Vnd daz die vorgenanten a^ebtissenn vnd der conuent dez vorgenanten gotzhus ze Wurmspach vnd all ir nachkomen vmb dis vorgenant selgera^et den kernen die phenning vnd o^vch den win dester bas besorget werden vff die gu^eter, alz vorgeschriben stât, so haben wir die vorgenanten her V^olrich von Wilberg vnd Johans von Wilberg gebrůder durch merer sicherhait aller vorgeschribener dingen v´nsrú aigenú insigel offenlich gehenkt an disen brief fúr v´ns fúr alle vnser erben vnd nachkomen. Der geben ist ze Rapreswile in der statt in dem jar, do man zalt von gottes gebúrt drúzehen hundert jar vnd dar nach in dem fúnf vnd sibenzigostem jar, an dem na^ehsten zinstag nach sant Michels tag dez hayligen himel fúrsten.

Source Fulltext: Chartularium Sangallense IX, Nr. 5473, S. 141-142.