Von der sto^esen wegen, so v´nser herrschafft von O^esterrich vnd der erwirdig herr der abte von Einsidellen¹ mitt einander hatten von der vall wegen, da haben wir der rât von Raprechtswil² der erberresten vnd der ehesten fúr v´ns besend, vnd hand die geret by den eyden, so si v´nser herrschafft gesworen hand, daz si nie nút anders von ir vordren vernomen noch geho^ert haben vnd selber nút anders wússen, won wer^a) ze Raprechtswil herr ist, daz der erben mag alle land sessen, die dar komen sind, es sije denne, daz si lib erben lassend ald ander erben, die von sibschafte wegen recht dar zů haben, von dien sol ein herrschaft ein valle nemen. Were och, daz vneliche kind da werint, dú nit gotzhús lút werint, es werint frowen ald man, die sol ôch ein herrschafft erben, es were denn, daz si lib erben Hessin ald ir gůt suss vergeben hettin, als recht ist, von dien sol och ein herrschafft ein valle nemen vnd sol sich des lassen benu^egen. Were och, daz v´nser herrschafft eygen lút hie ha^ette, die sol sy vallen vnd erben. § Waz mannen ze Raprechtswil ist, die von vater ald von můter gotzhus lút sind, die selben sol ein abte von Einsidellen vallen. Och wússen wir nút anders, wo ein vneliche kind ze Raprechswil ist, des vater ald můter gotzhus lút gwesen sind, gand dú ab an lib erben ald ob si ir gut anders nút vergeben hant, als recht ist, die sol och ein abte von Einsidellen vallen vnd erben. Och wússen wir nút anders, won daz siben gotzhúser gnossame zů einander hand, wo da dehein man hinder daz ander kême vnd der da ab gienge von todes wegen, da sol in denne daz selb gotzhus vallen. Vnd sind die siben gotzhúser daz gotzhus ze sant Gallen, daz gotzhus in der Rivhen O^vwe³, daz gotzhus ze Sekingen⁴, daz gotzhus Zúrich daz frijen frouwen kloster⁵, daz gotzhus ze Einsidellen, daz gotzhus ze Phfeuers⁶ vnd daz gotzhus ze Schennis⁷. Man sol och kein frouwen vallen. Wir haben och vernomen, daz kein nach jagender vogt vmb kein vall ie geualleti, die gotzhus lúti warint, die gen Raprechtswil geho^erent, won daz si eim abte von Einsidellen vall(ent). Vnd des ze vrkúnde so haben wir vnser statt ingesigel gedruket vff disen brieff in wendig ze ende dirre geschrifft. Datum feria tercia post Hylarii LXXVI^to.

Source Fulltext: Chartularium Sangallense IX, Nr. 5486, S. 156.