Allen, die disen brieff sechendt oder ho^erendt leßen, kundendt wir Heinrich Mu^eller von Velbach¹, den man nempt Stru^etz, vnnd Margretha min eliche wirtinne vnd veriechendt offenlich mit dißem brieff, das wir bedi mit wolbedachtem můtt miteinandren vnuerscheidenlich ze kouffen geben habendt dem frommen manne V^olrich Kolben burger ze Rapperschwyl² vnd sinen erben eynen halben müt kernen geltz järlich ze werenne ze sant Martins tag gen Rapperschwyll in die stat vmb syben pffundt pffennig gewonlicher Zu^ericher mu^entz, die wir von im empffangen habendt vnd in vnßren redlichen nutz bekerett hand. Vnd ist ze wu^essenne, das wir den obgenanten halben mu^et kernen geltz gesetz hand vff den acker, der do stoßet an die mistwu^erffi vor minem huß, vnd anderhalb vff das veld, vnd ist fry ledig eygen. Ouch ist ze wu^essenne, were das wir die obgenanten Heinrich vnd Margreta oder vnßer erben, ob wir enwerendt, dem egenanten V^olrich Kolben oder sinen erben den obgenanten halben mu^et kernen geltz nüt wertindt zů dem zil, als hie vor geschriben stadt, vnd ein zil das ander erlu^effe, so sol dem egenanten V^olrich oder sinen erben der obgenant acker verfallen sin ledig vnd loß, vnd sol ich noch kein min erben noch nieman anders von minen oder miner erben wegen den egenanten V^olrich oder sin erben niemer me geirren an dem obgenanten acker in keyner wyße, vnd sol inn nutzen besetzen vnd enzeßen als sin eygen gůtt. Herv´ber ze einem waren vrkund vnd vestung aller ding, so hie vor von vnß geschriben stadt, so habendt wir die obgenanten Heinrich vnd Margretha erbettenn den frommen manne Heinrich Murer vndervogt ze Gru^eningen³, das er sin insigel gehencket ha^vtt an dißen brieff, dar vnder wir vnß willenklichen bindendt, wan wir eygens insigels nu^et habendt. Ich der genant Heinrich Murer vergich ouch, das ich durch bett willen der obgenanten vnd ouch ze vrkund, das der egenant halb mu^et kernen geltz vor mir geverrgott ward an der fryen landstraß ze Rapperschwil an dem saltzmerckt mir vnd minen erbenn vnschedlich, min eygen insigel gehenckt han an dißen brieff. Der geben ward nach vnßer frowen tag ze mittem ougsten, do man zalt von gottes geburt dru^ezechenhundert vnnd sybentzig jar, darnach in dem sechßten jare.

Source Fulltext: Chartularium Sangallense IX, Nr. 5526, S. 198-199.