Allen, die disen brief sehent oder ho^erent lesen, kúnd ich Růdolf Wiso von Wettingen¹ amptman des erwirdigen mines gnedigen herren || des abtes von Wettingen² des ordens von Cyttels in Costentzer bistům, das fúr mich kam an der stat, da ich von des selben mines || herren wegen ze Hochvelden³ offenlich ze gerichte sass, fro Elsbetha To^eiberin von Glatfelden⁴ vnd Heinr. To^eiber ir sun fúr sich vnd fúr || Elsbethen der ietzgenanten fro Elsbeten To^eiberin tochter vnd Lútolt zem Tor mit inen ze ir wegen vnd fúr die Teningerin von Boppensol⁵ vnd fúr dero kint allú, won in die selben lút alle von eigenschaft des libes angeho^erent, offenberten vnd veriahen da vor gericht vmb die sto^ess vnd missehellung, so die egenanten fro Elsbet To^eiberin vnd die Teningerin vnd ir ietweder kint hatten mit den erwirdigen geistlichen fro^vwen der eptischin vnd dem conuent gemeinlich des gotzhus ze Wurmsbach⁶ des ordens von Cyttels in Costentzer bistům von einer schůpposs wegen, dú in den hof ze Schachen⁷ geho^eret, darzů die egenanten zwo fro^vwen vnd ir kint etwz ansprach hatten von Heinr. Selis von Schachen ir brůders wegen, das si da vmb die selben ansprache sto^esse vnd missehellung lieplich gu^etlich vnd vnbetwungenlich vnd mit bedachtem můte mit den vorgenanten der eptischin vnd dem conuent gemeinlich ze Wurmsbach gantzlich verricht vnd vereinbert sint, das inen die selben fro^vwen von Wurmsbach geben hant vnd o^vch si von inen genomen vnd empfangen hant zwen mútt kernen vnd vierzehen schilling Zúricher pfenning fúr alle die rechtung vorderung vnd ansprach, so si zů der vorgenanten schůpposs ie gehebt hant oder iemer gewinnen mo^echten, vnd veriahen o^vch die egenanten fro Elsbetha To^eiberin vnd Heinr. ir sun fúr sich vnd fúr Elsbethen ir tochter vnd Lútolt zem Tor ze iro vnd ze der vorgenanten Teningerin vnd ir kinden wegen, das si der selben zwei mút kernen vnd der vierzehen schilling pfenning gantzlich von inen gewert weren, vnd dar vmb so gaben vf die vorgenanten fro Elsbetha To^eiberin vnd Heinr. ir sun fúr sich vnd fúr Elsbethen sin swester der ietz genanten fro Elsbeten To^eiberin siner můter tochter mit des egenanten Lútoltz zem Tor ir herren hand vnd der selb ir herre mit innen ze ir vnd der vorgenanten Teningerin vnd ir kinden wegen mit gesamnoter hand alle die rechtung vorderung vnd ansprache, so si zů der egenanten schůpposs mit aller zůgeho^erde ie gehebt hant oder iemer gewinnen mo^echten, vnd lobten fúr sich vnd ir erben, die selben schůpposs mit aller zůgeho^erde niemer mere an ze sprechenne noch die egen(ante) eptischin noch den conuent ze Wurmsbach noch ir gotzhus noch nachkomen an der selben schůpposs mit aller zůgeho^erde niemer ze bekúmbern noch ze bekrenken weder mit worten noch mit werken noch mit geistlichen noch weltlichen gerichten noch ane gericht noch mit dekeinen sachen, so ietz funden sint oder hinnenhin ieman finden ald erdenken kan, in deheine wise, vnd taten dis vfgeben vnd gelúbde mit miner hand von des gerichtes wegen an brůder Johs. miner herren von Wettingen schafners hand ze der vorgenanten fro^vwen von Wurmsbach vnd ir gotzhus wegen, als gericht vnd vrteil gab vnd recht wz, dz es alles beidú nv vnd her nach gůt kraft haben sol, vnd trost o^vch der vorgenant Lútolt zem Tor fúr die egenanten sin eigennen lút, dz si vnd er mit inen ze ir wegen alles dz, so vorgeschriben stat, beidú nv vnd hernach war vnd stet halten vnd da wider niemer gesin noch getůn súln, vnd do dz beschach, do lies der egenant brůder Johs. schafner ze der vorgenanten fro^vwen von Wurmsbach vnd ir gotzhus wegen an recht, ob in dz gericht icht billich sinen brief her vber geben so^elt, der wart inen nach miner frag von erbern lúten mit gesamnoter vrteil erteilt ze gebenne, vnd dz o^vch der vorgenant Lútolt zem Tor sin insigel fúr die egenanten sin lút vnd fúr sich selben an disen brief henken so^elt. Hier vber ze einem waren vrkúnd so haben wir brůder Albrecht abt des vorgenanten gotzhus ze Wettingen⁸ disen brief von des gerichtes wegen, won es o^vch erteilt ist, mit vnserm insigel offenlich besigelt vnschedlich vns vnd vnserm gotzhus an allen vnsern zinsen vnd rechten, won der obgenant vnser amptman bi sinem eide vor vns wer ist gesin, dz dis vorgeschriben alles vor im vor gericht volfu^ert si. Ich der egenant Lútolt zem Tor han o^vch von der egenanten miner eigenn lúten wegen vnd o^vch fúr mich selben min insigel gehenkt an disen brief ze einer warheit aller vorgeschriben ding. Dis beschach vnd wart diser brief geben ze Hochfelden an der nehsten mitwochen nach sant Hylarijen tag, do man zalt von gottes gebúrt drúzehenhundert vnd sibenzig jar, darnach in dem sibenden jar, da ze gegen waren Heinr. Meijer von Hochvelden, Johs. Widmer von Búllach⁹, Heinrice Ha^egner, Johs. von Fro^eidn^vw von Glatfelden vnd ander erber lút.

Source Fulltext: Chartularium Sangallense IX, Nr. 5556, S. 228-229.