Wir des rychs stett, die die bvntnúss haltent vmb den Sêwe¹, von Costentz, von V´berlingen², von Rauenspurg³, von Wangen⁴ vnd von Bůchorn⁵, || die vff hútt disen tag, als dirre brief geben ist, ze Costentz bi anander gewesen sint, tu^ent kvnt vnd vergehin des offenlich mit disem brief allen den, || die in ansehent oder ho^erent lesen, daz fúr v´ns kament die erwirdigen herren brůder Růdolf von Homburg⁶ vnd ander brůder etwemainger des || Tútschen ordens, die bi im da warent, ze ainem tail vnd v´nser lieben aidgenossen dero von Lindôwe⁷ vnd dero von sant Gallen erberú botschafft ze dem andern tail, vnd satztent da baid tail vff v´ns mit gůtem willen vnbetwngenlich ir sto^ess, die si gen anander hattent, wie oder welen weg die sto^ess vnd sachen her geloffen sint bis vff hútt disen tag, daz was also, als brůder Hainrich der Schenk von Landegg⁸ des Tútschen ordens ze Lindôwe gevangen ward, vnd getrúwetent v´ns och baid tail, der selben sto^ess vnd sachen ze richtent, vnd batten v´ns darvmb sprechen, da habin wir si ze baiden tailn verho^ert vnd habin si och nach baider tail red vnd widerred mit iro willen vnd wissent vmb die selben sto^ess gesamnot vnd v´berain braht, also daz die selben Tútschen herren alle an iro vnd an irs ordens statt vnd svnderlich an des obgenanten brůder Hainr. des Schenken statt vnd alle die, die von ir wegen ze der sach gehafft sint, der selben stett dero von Lindôwe vnd von sant Gallen vnd aller ir burger vnd aller der, die der sach ratent ald helfent wisent ald wissent gewesen sint, iro aller luter gůt frv´nd vmb die selben sach sin vnd wesen sont, also in so^elicher gelicher wis vnd mass sont och die selben stett von Lindôwe vnd von sant Gallen vnd alle ir burger vnd alle die, die von ir wegen ze der sach gehafft sint, der selben Tútschen herren aller vnd des selben ordens svnderlich des obgenanten brůder Hainrichs des Schenken vnd aller der, die zů der sach gehafft sint, och luter gůt frv´nd sin vnd wesen vmb die selben sach, vnd sont och alle krieg vnd sto^ess, die si gegen anander gejagt vnd gefu^ert hant von der selben sach wegen, es sie gewesen ze Mentz⁹, ze Avion¹⁰, ze Rôme ald anderswa, was kost vnd schaden darvff geloffen vnd gangen ist, ze baiden siten ga^entzlich absin, also daz dewedre tail dem andern nv´t darvmb ist gebunden ze bessrent vsszerichtent noch ze a^entw´rtent, âne alle geuerde. Vnd ze warem vnd offem vrkv´nd vnd sta^eter sicherhait aller dirre vorgeschr(ibner) ding gebin wir der burgermaister vnd der rat der stat ze Costentz an v´nser vnd an der obgenanten v´nser aidgenossen statt vnd von ir bett wegen der selben v´nser stett ze Costentz insigel an disen brief. Der geben ist ze Costentz, do man von Cristes gebúrt zalt drúzehenhvndert jar, darnach in dem siben vnd sibentzigosten jar, an dem na^ehsten zinstag nach sant Laurentyen tag.

Source Fulltext: Chartularium Sangallense IX, Nr. 5601, S. 273-274.