Wir^a) dis nachgeschribnen des hailigen Ro^emischen richs stete Vlme, Costentz, Rútlingen¹, Rotwile², V´berlingen³, Ma^emmingen⁴, Bibrach⁵, Rauenspurg⁶, Lindow⁷, sant Gallen, Livtkirch⁸, Ysny⁹, || Wangen¹⁰ vnd Bůchorn¹¹ veriehen offenlich vnd tu^egen kunt allermenglich mit disem briefe, wan daz ist, daz dis nachbenempten dez hailigen richs stete Ezzelingen¹², Halle¹³, Hailbrunnen¹⁴, Gemvnde¹⁵, || No^erdlingen¹⁶, Dinkelspúhel¹⁷, Winphen¹⁸, Winsperg¹⁹, Wile²⁰, Pophingen²¹, Aulvn²², Kemptvn²³ vnd Koufbúrren²⁴ von sunderlichen trvwen, die si durch billich von dez hailigen richs wegen lang || zitz zů vns gehept hant vnd och noch fúro ha^vn súln, mit gůten fúrsa^etzen vnbetzwungenlich zů vns in vnsern bunde verstrikt verbunden verphliht vnd och den gesworn hant gelert aide zů den hailigen mit vfgebottnen vingern, den selben vnsern bunde mit vns ze halten ze laisten vnd och vollfu^eren in alle maynunge wort vnd wise a^vn alle geuêrde, alz och vnser bundbriefe, den wir dar vmbe ainander gegeben gemachet vnd besiglt haben, wiset vnd seit vnd alz och die briefe, die ieglichiv stat besunder vns dar vmbe och gegeben hant, begriffent vnd verschriben stant, dar vmbe so haben wir den selben vorgenanten steten allen daz ietzo bi gůten trvwen vnd bi den aiden, die wir vnserm bunde vnd in vnserm bundbriefe zů got vnd zů den hailigen gesworn haben, daz gelobt versprochen vnd verhaizzen vnd versprechen mit disem briefe, daz wir in allen vnd ieglicher stat besunder getrvwlich vnd a^vn alle geuerde, wa si dez bedo^erfften oder notdúrftig wúrden, beholffen vnd bera^vten bigestendig vnd ze statten komen sv´ln a^vn alle geuêrde nach vnsers bundbriefs sage vnd alz och vnser bundbrief wiset vnd seit, ze gelicher wise, alz ob si den bund von anfang [mit]^b) vns gehalten vnd gesworn heten vnd alle mit namen bi vns in vnserm bundbriefe begriffen vnd verschriben wa^eren oder durch reht ald von billich begriffen oder verschriben sin so^elten oder mo^ehten, a^vn alle geuêrde. Mit kraft vnd vrkúnde ditz offnen briefes, den wir in dar vmbe von vnser aller haissentz vnd gebottes wegen besiglten geben mit der stat ze Vlme vnd ze Rútlingen aignen angehenkten insigeln vnd div och baidiv ze gagen hangent. Daz beschach vnd wart dirr briefe gegeben ze Vlme in der stat der nehsten mikten vor sant Bartholomeus tag dez hailigen zwelfbotten, do man zalt nach gotz gebúrt drivzehenhundert jar vnd dar nach in dem siben vnd sibentzigosten jare.

Source Fulltext: Chartularium Sangallense IX, Nr. 5608, S. 281-282.