Allen^a) den, die disen brief ansehent lesent oder ho^errent lesen, tůn ich herr Cůn von Sto^effeln probst des gotzhus ze || sant Gallen¹, das an alles mittel dem stůl ze Ro^vm zů geho^ert, sant Benedictes ordens kunt vnd vergich offenlich mit di||sem brief fúr mich vnd fúr all min nachkomen, das fúr mich kam ze sant Gallen in der stat der erber knecht Johans || Frig von Mo^vgwille² vnd offnet da vor mir fúr sich vnd all sin erben vnd sprach, das er ab der múli halber vnd múlistat halber gelegen ze Bromshouen³ in dem dorf, die mit allen rechten vnd mit aller zůgeho^ert nútzen vnd gewonhaiten von mir vnd von miner der vorgenanten probstig sin recht zinslehen wa^er, ainen mutt kernen ia^erlichs vnd sta^etes geltes vnd zinses gůtes vnd gena^emes Wiler⁴ messes von siner redlichen not wegen aines vngeuarlichen ko^vfs recht vnd redlich verko^vft hetti vnd ze ko^vffen geben hetti Margarethen Múllerinen von Bromshouen Hans Huntzikouers von Mitlon⁵ elichi tochter wilent Peters sa^elgen Múllers von Bromshouen elichi wirtenn vnd Johansen ir elichen sun baiden gemainlich vnd vnuerschaidenlich ze ainer rechten gemaind vnd iro erben, ob sú enwa^erint, vmb sechs pfunt pfenning alles gůter vnd gena^emer Costentzer múns vnd der er och nach siner vergicht von inen gar vnd gantzlich gewert wa^er vnd bezalt an den stetten, da er sinen schinberen nutz mit geschaffet het, mit so^elicher beschaidenhait, das der vorgenant Johans Frig vnd sin erben, ob er enwa^er, der vorgenanten Margarethen Múllerinen vnd Johansen ir elichen sun vnd iro erben, ob sú enwa^erint, das vorgenant ia^erlich kernen geltes des egedachten messes ietz ze dem na^echsten sant Martis tag, der nu kunt, vnd dannanhin ia^erlich ie ze sant Martis tag an allen abgang vnd minnrung geben weren vnd antwúrten sont in der vorgenanten múli, vnd gab da der vorgenant Johans Frig das vorgenant ia^erlich kernen gelt ab der vorgenanten múli halber vnd múlistat halber mit allen rechten vnd mit aller zůgeho^ert vf an min hand vnd bat mich, es ze lihen der vorgenanten Margarethen Múllerinen von Bromshouen vnd Johansen ir elichen sun baiden gemainlich vnd vnuerschaidenlich ze ainer rechten gemaind vnd iro erben, ob sú enwa^erint, das tet ich vnd erhort sin ernstlich bet vnd lech do ze stund mit gůter vorbetrachtung vnd beschaidenhait vnd lich och mit vrkúnd dis briefes der vorgenanten Margarethen Múllerinen vnd Johansen ir elichen sun vnd iro erben, ob sú enwa^erint, das vorgenant ja^erlich kernen gelt ab der vorgenanten múli halber vnd múlistat halber mit allen rechten vnd mit aller zůho^ert^b) nútzen vnd gewonhaiten, vnd ist dis alles beschehen an minen des vorgenanten herrn Cůn von Sto^effeln vnd miner nachkomen rechten vnscha^edlich vnd mit allen den worten vnd werchen, so von recht vnd von gewonhait dar zů nútz vnd notdurftig warent. Vnd des ze ainer waren sicherhait aller vorgeschriben ding vnd geding so hab ich der vorgenant herr Cůn von Sto^effeln min aigen insigel gehenk an disen brief. Der geben ist ze sant Gallen in der stat, do man zalt von gottes gebúrt drúzehenhundert jar, sibenzig jar vnd dar nach in dem sibenden jar, an dem na^echsten ma^entag vor sant Johans tag des To^vffers ze sunnwendi.

Source Fulltext: Chartularium Sangallense IX, Nr. 5588, S. 260-261.