Ich^a) Othmar Wildrich stattamman ze sant Gallen¹ tůn kunt vnd vergich offenlich an disem brief allen, die in ansehent lesent oder ho^erent lesen, daz fúr mich || kament ze sant Gallen in der stat an dem na^ehsten ma^entag vor sant Thomas tag des zwelffbo^vtten, do ich offenlich ze geriht sass, die fromen beschaiden || Albreht von Ainwille² ze ainem tail, Bartholome Blârrer, Johans Blârrer vnd V^olrich Ko^echler pfleger des spitals des hayligen gaistes ze sant Gallen³ ze dem || andern tail, vnd offnot do der selb Albreht von Ainwille offenlich vor mir vnd dem geriht mit fúrsprechen, daz er mit gůter vorbetrahtunge nach siner frúnden vnd ander erber lúten rât den obgenanten Bartholome Blârrer, Johansen Blârrer vnd V^olrichen Ko^echler pflegern des spitals ze sant Gallen vnd iren nachkomen an des selben spitals stat verko^vfft vnd reht vnd redlich ze ko^vffenn geben het den hof, den man nemmet Langendannen⁴, gelegen ob der statt ze Byschoffzelle⁵ vnd ainhalb sto^vzzet an den hof genant Schlatt⁶ andrunt an den hof genant Rúti⁷, der selb hof sin reht âigen wa^er, mit wunne mit waid mit holtz mit veld mit akkern mit wisen mit wasen mit zwî mit wasser mit wasserflússen mit allen rehten nútzen vnd gewonhaiten vnd mit aller êhafti, so darzů vnd darin geho^ert, es sie benemt ald vnbenemt, vmb drithalb vnd sêhtzig pfunt pfenning gůter vnd gena^emer Costentzer múns, die sie im darumb geben hettint vnd gar vnd gantzlich von inen gewert vnd bezalt wa^er, den selben hof genant Langendannen mit aller rehtung vnd zůgeho^erd wo^elt er o^vch den vorgenanten pflegern an des obgenanten spitals stat fúr reht âigen vertgen vnd v^fgeben, vnd batt im darumb an gemainer vrtail ze eruarn, wie er das tůn so^elt vnd mo^eht, daz es krafft vnd maht hetti nû vnd hie nach. Do fragt ich vorgenanter amman vrtail vmb, vnd ward mit gemainer vrtail ertailt, daz der vorgenant Albreht von Ainwille an offener des rîches strâsse gân so^elt vnd da den vorgenanten hof mit aller zůgeho^erd in der obgenanten pfleger an des vorbenemten spitals stat vnd ze sinen handen v^fgeben vnd fúr reht âigen vertgon so^elt, als vmb semlichi gůt gewonlich vnd reht ist ze vertgenn, vnd wenn dann daz bescha^ech, das das dann wol krafft hetti vnd billich haben so^elt nach dem rehten nû vnd hie nach. Also vertgot o^vch do ze mâl der selb Albreht von Ainwille frilich willeklich vnd vmbetwungenlich den vorgenanten pflegern an des vorbenemten spitals ze sant Gallen stat vnd ze sinen handen den vorbenemten hof genant Langendannen mit aller rehtung vnd zůgeho^erd an offener des rîches strasse fúr reht âigen, als vorgeschriben stat vnd als im mit gemainer vrtail ertailt wart. Darnach verzech sich der selb Albreht von Ainwille willeklich vnd vmbetwungenlich vnd verzîhet sich mit disem gegenwúrtigen brief fúr sich vnd fúr alle sin erben gen den obgenanten pflegern vnd iren nachkomen vnd dem vorbenemten spital aller aigenschafft aller lêhenschaft alles rehten gaistliches vnd weltliches rehtes vnd gerihtes aller vordrung vnd ansprach, so er ald sin erben an dem zů dem vnd von des vorgeschribenen hofes wegen ald zů dehainen rehten, so darzů vnd darin geho^errent, iê gehattont ald hie nach iemer gehaben oder gewinnen mo^ehtint in dehainen weg mit dehainen sachen âne geuerde. O^vch lo^vpt der selb Albreht von Ainwille fúr sich vnd sin erben, des vorgeschribenen hofes vnd ko^vffes reht wer ze sinne nach âigens reht gen ma^englichem vor gaistlichem vnd vor weltlichem gerihte vnd o^vch die vorbenemten pfleger vnd alle ir nachkomen vnd den vorgenanten spital darumb ze versta^enne vnd ze versprechenn ân allen iren schaden vor gaistlichem vnd vor weltlichen gerihten vnd mit namen an allen stetten, wenn wâ ald wie dik sú des no^vtdurftig sint ald von ieman darumb angesprochen oder vfgetriben wurdint mit dehainen sachen, âne geuerde. Vnd ist ditz alles reht vnd redlich vor mir vollfu^ert vnd beschehen mit allen den worten vnd werken, so von reht ald von gewonhait darzů gehortent vnd no^vtdurftig warent vnd als es krafft vnd maht hat vnd billich haben sol. Vnd des ze ainem wâren vrkúnd vnd gantzer sicherhait aller vorgeschribenen ding vnd geding so han ich Othmar Wildrich stattamman da vorgenant min âigen insigel von des gerihtes wegen offenlich gehenkt an disen brief, won o^vch das mit gemainer vrtail vor mir ertailt wart, daz ich es billich tůn so^elt. Ich Albreht von Ainwille da vorgenant vergich offenlich an disem brief, das alles das wâr ist, so der obgenant Othmar Wildrich stattamman da vorgenant von mir an disem brief veriehen hât, vnd ze mêrer sicherhait der selben ding so han ich o^vch min âigen insigel fúr mich vnd fúr alle min erben offenlich gehenkt an disen brief. Der geben ist an dem vorgeschribenen ma^entag in dem iâr, do man zalt von Cristus gebúrt drútzehenhundert iâr, sibentzig iâr vnd darnach in dem sibenden jâre.

Source Fulltext: Chartularium Sangallense IX, Nr. 5624, S. 294-295.