Wir^a) dis nachgeschribnen des hailigen Ro^emischen riches stete Vlme, Costentz, Ezzelingen¹, Rútlingen², Rotwile³, Wile⁴, V^eberlingen⁵, Memmingen⁶, Bybrach⁷, Ravenspurg⁸, Lyndow^e9, sant Gallen, Kemptvn¹⁰, Koufbúrren¹¹, Livtkirch¹², Isny¹³, Wangen¹⁴, Bu^echorn¹⁵, Gemv´nd¹⁶, Halle¹⁷, Hailbrvnnen¹⁸, No^erdlingen¹⁹, Dynkelspúhel²⁰, || Pophingen²¹, Wymphen²², Winsperg²³ vnd Aulun²⁴ bekennen alle offenlich vnd ainmu^etklich mit disem briefe vnd tu^egen kunt allen den, die in an sehent oder ho^erent lesen, wan rehter fúrsatze go^etlicher wishait dar vff genaigt vnd och naturlichiv geschribniv reht wisent vnd gebietent, daz alle lút gebunden sint gemaynen nvtze || vnd fride ze fúrdrent vnd den schaden dez gemainen gůtz ze wendent, dar an haben wir gedaht vnd haben och denne fúr vns gesetzet angesehen vnd betrachtet, wie daz daz haylig riche vnd gemains land witwen vnd waisen mit kainen sachen alz wol alz nvtzlich vnd alz trostlich beliben vnd bestan mugen alz mit dem, daz || frid vnd gemach geschephet vnd gemachet werde, wan aber sich nv daz aigenlich wol erfunden hat, daz gemains lande mit dehainen sachen alz wol geschirmet vnd daz haylig riche gesterket vnd gemeret werden mag alz mit dem, daz wir aynhellig sien vnd ainander bigestendig vnd zů fride beholffen vnd bera^vten sien, dar vmbe vnd von so^elicher ma^enigfaltiger ere vnd nutze, die in kúnftigen ziten dar vs wahsen vnd ga^vn mag, so haben wir vns alle ainhelliklich vnd mit gůten bera^vtenn fúrsetzen got ze lob dem hayligen riche ze trost vnd ze eren vns selb vnd gemaynem lande ze fride vnd och ze gemach vns selb ainer lieblicher frivntschafft vnd gelúbde mit gůter vorbetrachtunge gesampnet verstrikket vnd v´berain komen verbinden vnd verstrikken vns och der ietzo ze samen mit rehter wissent vnd krafft ditz briefs bi gůten trvwen ainberklich vnd mit ayden, die wir dar vmbe alle liplich ze got vnd zů den hailigen gesworn haben, hynnan bis vff sant Go^erien tag, der nehst kumpt, vnd dannan hin siben gantziv jar die nehsten nachainander ze zellent, also vnd in aller der wise maynungen vnd artikeln ze haltent vnd ze vollfu^erent a^vn alle geuerde, alz hien nach begriffen vnd verschriben stat. Bi dem ersten sien wir v´berain komen, wa^er daz dehayn herre ritter oder kneht gesellschafft oder wer ald wie die genant wa^eren vns vorgenante stete gemainlich ald ain oder mer besunder, die ietzo bi vns in diser gelúbde vnd buntnv´zze sint oder die noch fúro zů vns dar in tra^eten oder ka^emen, es wa^eren herren oder stete, in der zit, alz diser bunde weren sol, angriffen beku^emberren drengen oder beschadigen wo^elten an vnsern rehten fryhaiten briefen oder gůten gewonhaiten, die wir haben von Ro^emischen kaysern vnd kúnigen, oder es were mit schatzvnge mit versetzent oder vmb anderer sachen, wer der were, der vns dar vmbe also ze beschedigen maynte oder angriffe, nieman vsgenomen a^vne allayn dem hayligen riche syniv reht ze halten vnd ze tu^end a^vn alle geuerde, dez súln wir die obgenanten stete, die ietzo in dem bund sint oder die noch fúro zů vns dar in ka^emen, es weren herren oder stete, ain ander getrúwlich beholffen vnd bera^vten sin den selben, die also vnder vns beschadiget sint, ez sien herren oder stete, a^vn alle geuerde, als ob es vnser selbs sache were vnd vns allen selber beschechen were. Vnd wa^er, daz kayn vordrung oder můtunge bescheche von vnserm herren dem kaiser dem Ro^emischen ku^enige oder von iemant andre von iren wegen, dar vmbe sol sich doch kain stat vmb so^elich sache versprechen noch verantwúrten noch kaynen vortail dar inne sůchen noch vffnemen, si beru^effe denne vor alle stete gemainlich in diser buntnúzze ze samen, vnd sol die sache nach gemayner stett rat vnd nach dem merren tail ir erkantnv´zze daz verantwúrten vnd sol och bi den aiden da bi beliben. Were aber, daz der stette dehayniv, die ietzo in diser gelúbde sint oder die noch fúro dar in tra^eten oder ka^emen, es wa^eren herren oder stete, dar v´ber von ieman angegriffen wúrden, so sv´ln wir andren stete gemainlich den zog vnd den angriff wenden an herren vnd an iren dienern, vnd súln alle die, die den schaden geta^vn hant oder tůn wo^elten ald die hilfflich dar zů gewesen sint, angriffen vnd beschadigen an lib vnd an gůt, alz verre vnser vermugent geraichet, a^vn alle geuerde. Vnd wa^er, daz dehayner der selben herren diener, die den angriff ta^eten, stille sitzen wo^elten, den sol man dennocht angriffen vnd beschadigen, es were denne, daz der selbe sweren vnd brief v´ber sich selb geben wo^elte, daz er in vier gantzen jaren den nehsten nachainander wider vns noch vnsern bunde niht sin wo^elt noch vns beschadigen wo^elte. Were och, daz dehain stat ain oder mer, die ietzo in diser gelúbde sint oder noch fúro dar in ka^emen, es wa^eren herren oder stete, von iemant angegriffen wúrde, wer die wa^erent, vnd die den andren steten niht kúndig wa^erent, wenne denne die selben beschadigeten herren oder stete vns andren steten den oder die verkúndent, die den schaden geta^vn hant oder die hilfflich dar zů gewesen sint, den oder die súln denne aber die selben stete vnder vns, den es also verkúntt wirt, angriffen vnd beschadigen an in selbe vnd och an ir lu^et vnd gu^etern vngeuarlich vnd als ob in der schade selber beschechen wa^er. Vnd wa^er, daz dehain herre ritter oder kneht dero dehainen husety oder hofety oder kost gebe, die vns beschadigoten, oder daz er weren wo^elte, daz man den steten kost zůfůrte, den súln wir stete och angriffen vnd beschadigen, als vorgeschriben stat. Wa^er ouch, daz dehain stat vnsers bundes, die ietzo dar inne sint oder noch fúro zů vns dar in ka^emen, es wa^eren herren oder stete, von der vorgenanten artikel wegen angegriffen wúrden, weren denne der oder die, die den angriff geta^vn heten, der selben angegriffnen stat gesezzen vnd wo^elte denne die selben stete oder stat die selben och dar vmbe angriffen vnd dúhte sy, das es ir ze stark were, die selben mo^ehten denne wol die nehsten stete zů in manen besenden vnd ru^effen, daz sy in dar zů beholffen weren, alz ma^enig si dúht, daz in dar zů notdúrftig weren. Werent aber die, die den schaden geta^vn hetten, ainer andren stat bas gesezzen, so mag div angegriffen stat den selben steten och gebieten, daz si die dar vmbe angriffen. Wa^er es aber den ze stark, die mo^ehtent aber den nehsten steten zů in ru^effen vnd gebieten, vntz daz div sache erobert wúrde vnd der schade wúrde abgeleit. Wa^er ouch, daz dehain stat, die ietzo bi vns in vnserm bunde ist oder die noch fúro zů vns dar in ka^em, also angegriffen vnd mit geliger besezzen wúrde, div sol vnd mag die nehsten dry^e stete manen vnd gebieten, daz si ir vnuerzogenlich ze helff komen mit ir lúten mit zivg mit kost vnd mit andren sachen vngeuarlich, da mit si ir stat besorgen vnd geretten mugen, vnd wa^er, daz si dez fúrbaz notdúrftig wúrden, so mugen si die andren stete och die nehsten in ayner bilichy zů in manen in der selben wise, vnd waz kost denne dar vff gieng, die kost sv´ln wir die stete gemainlich liden vnd tragen ieglichiv stat nach anzal ir gewonlicher stivre, vnd sol och die kost ieglichiv stat in zwayn manoden bezaln nach dem zyte, so die stette gemainlich die kost an geleit hant. Welhiv stat och kost dar lihi, div mag die andren stete alle dar vmbe manen vff ainen tag, vnd sond da die stete die kostan an legen nach irem besten a^vn alle geuerde. Wa^er och, daz ieman, es weren herren stete ritter oder knehte, begertent in dise gelúbde vnd frivntschaft ze komen, der oder die mugent daz bringen an weih stat si wend vnsers bundes, vnd dunket denne die selben stat, daz die stete dar vmbe ze manent sien, daz mag si wol tv^on, vnd wez sich denne die stete da gemainlich oder mit dem merren taile erkanten, wie der in ze nement were, da bi sol es beliben. Wa^er och, daz ieman vns vorgenante stete ain oder mer, die ietzo bi vns in vnserm bunde sint oder noch fúro zů vns dar in ka^emen, wo^elt fehen oder vigentschaft antragen vmb so^elich angriffe, die im von vns in diser gelúbde vnd frivntschafft beschechen oder widerfaren wa^eren, den selben steten oder stat, ir wa^er ain oder mer, so^eln wir die andern stete alle bi gůten trvwen vnd bi vnsern aiden dar vmbe beraten vnd beholffen sin nach dem zit, so disiv gelúbde ain ende hat, vntz daz div sache gentzlich erobert vnd vsgetragen wirt, a^vn alle geuerde, vnd hant och die selben stete, die also beschadiget weren oder wurden, vollen gwalt, vns dar vmbe ze manent vnd zů zesprechen, alz vorgeschriben stat. Wir sien och mit rehtem namen dez v´ber ain komen, ob daz wa^er, daz dehayn stat ain oder mer, die ietzo bi vns sint oder noch fúrbaz zů vns ka^emen, mit ainer andren steten oder stat vnsers bundes iht brúche sto^ezze oder misshelung heten oder gewu^ennen, vmb waz sache daz wa^er, daz da entwedre stat selb dar zů nihtz tv^on angriffen noch die andren stete oder stat dar vmbe beschedigen noch vfheben sol, alle die wile vnd diser vnser bunde weret. Vnd die selben stete oder stat, die so^elich sto^ezze mit ainander heten, sv´ln daz bringen fúr gemain stete vnd den baidenthalbe ir klag red vnd widerrede fúrlegen vnd erzellen, vnd wez die stete gemainlich oder ir der merre taile sich denne dar vmbe erkennent ald wie si daz entschaiden vnd vsrihtent, es si mit minne oder mit dem rehten, oder wes ald wa hin si die wisent, dez sv´ln baid taile gefo^elgig sin vnd so^eln och bi dem aide da bi beliben a^vn alle geuerde. Wir haben och disen vnsern bunde also geordent vnd vns dar vff also ze samen versprochen, wer daz wir kain stukke oder artikel dar inne bessren wo^elten, daz wir dez volle maht vnd gewalt haben sv´ln vnd och wol getv^on mugen, ob sich dez oder wie sich dez die stete oder ir der merr tail erkennent vnd ze rat werdent, doch sol disiv vnsriv gelúbde vnd frivntschafft die obgen(anten) zit vnd jare beliben vnd daz wir kain stukke niht mindren sv´ln, es bescheche denne mit vnser vorgenanter stete gůtem ainbern willen. Es súln och vmb alle vorgeschribne stukk vnd artikel alle manunge beschechen gen Bibrach in die stat, es were denne, daz wir stete oder vnser der merr tail ainer andren gelegner stat ze raut wúrden, da bi sol es denne aber beliben. Es súln och die von Vlme, von Costentz vnd von Ezzelingen ieglichiv stat zwen von iren ra^eten zů dem spruche setzen vnd der andren stette ieglichiv ainen. Vnd wenne wir och ze samen gemant werden, were denne, daz kain stat dar an sv´mig wa^ere vnd niht ka^em, alz si gemant were, der git ieglichiv stat zwaintzig guldin an der gemainen stett kostan, vsgenomen allayn der von sant Gallen, von Isnyn, von Wangen, von Livtkirch, von Koufbúrren, von Bůchorn, von Winphen, von Winsperg, von Pophingen vnd von Aulvn, der ieglichiv stat git zechen guldin, vnd sol och sich dez kayn stat niht sperren noch widren, es wa^er denne, daz sich ain stat mit ayden da von genemen mo^ehte, daz si ehafft not geirret het. Were och, dez wir zů got niht getrvwen, daz kain stat in diser gelúbde sich dar an v´bersehe vnd niht hielte noch vollfůrte die artikel, die vorgeschriben sint, vngeuarlich, wúrde div dez v´ber wunden mit dem rehten mit erkantnv´zze dez merren tails der stete, div so^elte denne geben ze pen ie von hundert phunt hallern zway hundert phunt gůter haller nach anzal ir gewonlicher stivre aber an gemain kostan der stette, ez were denne, daz si sich mit aiden da von genemen mo^ehten, alz vorgeschriben stat, daz si ehaft not geirret het. Vnd sol och div vorgeschriben vnser buntnúzze vnd gelúbde in aller der wise, alz vorgeschriben stat, weren krafft habin vnd sta^et beliben a^vn geuerde die vorgeschribnen zit vnd jare, daz ist hinnan bis vff sant Go^erien tag, der nehst kumpt, vnd dar nach syben gantziv jar die nehsten nachainander, alz och daz vor begriffen ist, es wa^er denne, daz vns ander bu^ende oder lantfrid ze handen giengent, die vns vff ze nement werent, dez sich die zwen tail oder mer vnder vns erkanten vnd dúhten vff ze nemen, daz sol also beliben, vnd sol der dritt taile dem merren tail dar an gefo^elgig sin. Vnd haben och also alle vorgeschribene sache stukk bu^ende vnd artikel gelobt bi den vorgeschribnen gesworn ayden sta^et ze haltent vnd ze vollfu^erent luterlich vnd a^vn alle geuerde, alz vorgeschriben stat. Vnd dez allez ze warem offnem vrku^ende vnd daz es sta^et belibe, so haben wir die obgeschribnen dez hailigen richs stete alle siben vnd zwaintzig vnserr stett gemainiv aigniv insigl offenlichen gehenket an disen briefe. Der geben ist an sant Thomans abent dez hayligen zwelffbotten vor wihennehten, do man zalt nach gotz gebúrt drivzehenhvndert jar vnd dar nach in dem syben vnd sybentzigosten jare.

Source Fulltext: Chartularium Sangallense IX, Nr. 5626, S. 296-299.