Wir dez hailigen nach geschriben dez riches stet, die den bunde haltent sint vmb den Sêe¹ in Swaben, Costentz, V^eberlingen², Rauenspurg³, || Lindow⁴, sant Gallen, Wangen⁵ vnd Bůchorn⁶ vergehint offenlich mit disem brieff, alz dem edeln wolerboren herren graff Hugen von Werdenberg⁷ || fúr vns die stett gen Bůchorn in die stat vff disen hu^etigen tag, alz diser brieff geben ist, verkúndet wart sich ze verantwurtent von clag wegen || dez spitalz pfleger dez spitalz vnd dez spitalz maister ze V^eberlingen vnd V^olriches Humpis burgers ze Rauenspurg, alz die ze dem egenanten graff Hugen clegtent von fůterhaberns wegen, den er vff daz dorff ze Siggingen⁸ gelet hett, vnd von der taffern vnd dez gerihtes wegen in dem selben dorff ze Siggingen, dar an si der egenant graff Huge vnd sin brůder iertint vnd bekrantint, vergehint wir die egenanten stett, daz der vorgenant edell graff Huge vff den selben tag, alz im verkúndet wart, fúr vns gen Bůchorn kom, vnd verhort da selben von wort ze wort ain abgeschrifft dez ko^vffbriefes dez egenanten dorffes ze Siggingen, vnd nach clag vnd fúrlegung der egenanten vnd widerrede dez vorgeschriben graff Hugen vnd nach vil rede, dú da entzwischen geloffen ist, habint wir gemainlich vnd ainba^erlichen den edeln vorgenanten graff Hugen ernstlichen vnd flekclichen gebetten, vns die sache ze ergende vnd da von ze lassent, der selben sache vns der vorbenemt graff Huge alle gemainlichen geerot ergeben vnd getrewet hat, also daz die vorgenanten der spital ze V^eberlingen dez selben spitalz pfleger vnd spitalz maister vnd alle ir nachkoment vnd o^vch der dikkgenant V^olr. Humpis vnd alle sin erben bi dem vorgenanten dorff ze Siggingen mit allen rehten nútzzen vnd zůgeho^erden, alz ir brieff wisent, bi dem geriht ze Siggingen vnd bi ir briefen, die si von der egenanten herschaft von dez vorgeschriben dorffes ze Siggingen innehant, gerůwet vnd vngemu^eget vnd vnbekrenket beliben sont a^vn alle geua^erde, vnd do der egenant edell graff Huge also von der sache geliess, batent vns die egenanten zwen tail, ain vrkúnde ains briefes diser sache vnd vsspruches ze gende, der in o^vch da geben vnd verhaissen ward. Diser sache sint gezúge vnd da bi gewesen, die do der egenanten vnser stette botten warent, Hainrich Tettikouer, den man nempt den Zapffen, Cůnrat Schindelly von Costentz, Cůnrat Go^etzzly, Hans Hatzzenberg von V^eberlingen, Wilhalm Maygenberg, Johans der Haslacher von Rauenspurg, Hainr. Rienolt, V^olrich Binder von Lindowe, Jacob^a) Růpreht, Johs. der Widmer von sant Gallen, Hipp der Hipper von Wangen, Johans Wagenman, Hainr. der Brunwurtzz von Bůchorn. Vnd dez alles ze warem offem vnd sta^eter vrkúnde habint wir die egenanten stette alle gemainlichen gebetten die stat ze Bůchorn vmb ir insigel ze henkent an disen brieff. Der geben ward vnd beschach diz ding, do man zalt nach Cristes gebúrt drúzehenhundert vnd sibentzig jar, dar nach in dem sibenden jar, an sant Katherinen tag der hailigen junkffrowen.

Source Fulltext: Chartularium Sangallense IX, Nr. 5620, S. 291-292.